नवी दिल्ली: महाराष्ट्राचे मुख्यमंत्री देवेंद्र फडणवीस यांनी सोमवारी नवी दिल्ली येथे पंतप्रधान नरेंद्र मोदी यांची भेट घेतली. या भेटीत महाराष्ट्रातील विविध विकासकामे, पायाभूत सुविधा प्रकल्प तसेच केंद्र आणि राज्य सरकारच्या समन्वयातून सुरू असलेल्या योजनांच्या प्रगतीबाबत सविस्तर चर्चा झाली.
पंतप्रधान कार्यालयाकडूनही या भेटीची माहिती सोशल मीडियाच्या माध्यमातून देण्यात आली. मुख्यमंत्री फडणवीस यांनी महाराष्ट्रातील विविध महत्त्वाच्या विकास प्रकल्पांची माहिती पंतप्रधान मोदी यांना दिली. राज्याच्या विकासाला अधिक गती देण्यासाठी केंद्र सरकारकडून आवश्यक सहकार्य मिळावे, अशी अपेक्षाही त्यांनी व्यक्त केली.
महाराष्ट्राला देशाच्या विकासाच्या प्रवासात आघाडीवर ठेवण्यासाठी केंद्र-राज्य समन्वय महत्त्वाचा असल्याचे फडणवीस यांनी यावेळी अधोरेखित केले. विविध संयुक्त प्रकल्प आणि योजनांसाठी केंद्र सरकारने सातत्याने सहकार्य करावे, अशी विनंतीही त्यांनी केली.
पंतप्रधान मोदी यांच्या भेटीनंतर फडणवीस यांनी सोशल मीडिया प्लॅटफॉर्मवर भेटीचे फोटो शेअर केले. पंतप्रधानांकडून मिळणारे मार्गदर्शन आणि महाराष्ट्राला मिळणाऱ्या केंद्र सरकारच्या पाठिंब्याबद्दल त्यांनी आभार व्यक्त केले. पंतप्रधानांची भेट नेहमीच प्रेरणादायी असून विकासाच्या मुद्द्यांवर त्यांचे मार्गदर्शन सकारात्मक ऊर्जा देणारे असल्याचे फडणवीस यांनी नमूद केले.
दरम्यान, मुख्यमंत्री देवेंद्र फडणवीस यांनी नवी दिल्ली येथे केंद्रीय अर्थमंत्री निर्मला सीतारामन यांचीही भेट घेतली. या भेटीची छायाचित्रेही समोर आली आहेत.
मुख्यमंत्र्यांच्या दिल्ली दौऱ्यात पंतप्रधान आणि केंद्रीय अर्थमंत्र्यांसोबत झालेल्या या भेटींमुळे महाराष्ट्रातील आगामी विकास प्रकल्पांसाठी केंद्र सरकारकडून सहकार्य आणि समन्वयाला आणखी चालना मिळण्याची अपेक्षा व्यक्त केली जात आहे.
