नागपूर : बँक कर्मचाऱ्यांच्या प्रलंबित मागण्यांसाठी युनायटेड फोरम ऑफ बँक युनियन्स (UFBU) ने २८ ते ३० सप्टेंबरदरम्यान तीन दिवसांच्या देशव्यापी संपाची हाक दिली आहे. या संपामुळे सार्वजनिक क्षेत्रातील बँकांच्या शाखांमधील नियमित कामकाजावर परिणाम होण्याची शक्यता आहे.
पाच दिवसांचा बँकिंग आठवडा लागू करण्यासह विविध मागण्यांसाठी हा संप पुकारण्यात आला आहे. संपाच्या आधी शनिवार आणि रविवारची सुट्टी असल्याने ग्राहकांना सलग पाच दिवस बँक शाखांमधील सेवा प्रभावित होण्याचा सामना करावा लागू शकतो.
संपात देशातील नऊ प्रमुख बँक कर्मचारी संघटना सहभागी होणार असल्याचे सांगण्यात आले आहे. त्यामुळे धनादेश वटवणे, रोख रक्कम जमा करणे किंवा काढणे यासह शाखांमधील काही प्रत्यक्ष सेवा प्रभावित होण्याची शक्यता आहे.
या पार्श्वभूमीवर एसबीआयने ग्राहकांना महत्त्वाचे बँकिंग व्यवहार आधीच पूर्ण करण्याचा सल्ला दिला आहे. तसेच गरजेनुसार इंटरनेट बँकिंग, मोबाईल बँकिंग, यूपीआय आणि इतर डिजिटल सेवांचा वापर करण्याचे आवाहन करण्यात आले आहे. रोख रकमेची आवश्यकता असल्यास तीही वेळेत उपलब्ध करून ठेवण्याचा सल्ला देण्यात आला आहे.
