नागपूर : विदर्भासह राज्यभरात उष्णतेची तीव्र लाट कायम असून नागपुरात उन्हाचा कडाका जीवघेणा ठरत आहे. गेल्या 24 तासांत नागपूरचे तापमान तब्बल 45.5 अंश सेल्सिअसपर्यंत पोहोचले असून उष्माघातामुळे एकाच दिवसात 3 जणांचा मृत्यू झाल्याची धक्कादायक माहिती समोर आली आहे. वाढत्या तापमानामुळे नागरिकांचे हाल होत असून दुपारच्या वेळी रस्ते ओस पडल्याचे चित्र शहरात पाहायला मिळत आहे.
हवामान विभागाने विदर्भ, मराठवाडा आणि उत्तर महाराष्ट्रात पुढील काही दिवस उष्णतेची तीव्र लाट कायम राहण्याचा इशारा दिला आहे. विशेषतः नागपूर, अकोला, अमरावती, चंद्रपूर आणि वर्धा जिल्ह्यांमध्ये तापमान आणखी वाढण्याची शक्यता व्यक्त करण्यात आली आहे.
Gold Rate
May 14- 2026 - Time 10.30Hrs
डॉक्टरांनी नागरिकांना अत्यावश्यक कामाशिवाय दुपारी 12 ते 4 या वेळेत घराबाहेर न पडण्याचा सल्ला दिला आहे. लहान मुले, ज्येष्ठ नागरिक आणि आजारी व्यक्तींनी विशेष काळजी घ्यावी, असे आवाहन प्रशासनाकडून करण्यात आले आहे.
दरम्यान, उष्माघात टाळण्यासाठी भरपूर पाणी पिणे, डोक्यावर टोपी किंवा कापड वापरणे, हलके आणि सूती कपडे परिधान करणे तसेच उन्हात दीर्घकाळ थांबणे टाळण्याचे आवाहन करण्यात आले आहे. नागपुरातील वाढत्या उष्णतेमुळे आरोग्य यंत्रणाही सतर्क झाली असून रुग्णालयांमध्ये विशेष व्यवस्था करण्यात येत आहे.
