नागपूर :नागपूर रेल्वे स्थानक परिसरात प्रवाशांचे मौल्यवान सामान लंपास करणाऱ्या एका महिला चोरांच्या टोळीचा पर्दाफाश करण्यात आला आहे. या प्रकरणात गुजरातमधील भावनगर येथील चार महिलांना नागपूर लोहमार्ग पोलिसांनी अटक केली असून त्यांच्या कब्जातून अंदाजे एक लाख रुपयांचा ऐवज जप्त करण्यात आला आहे.
दोन वेगवेगळ्या घटनेत प्रवाशांची चोरी झाल्यानंतर पोलिसांनी तपास सुरू केला होता. या तपासात संबंधित टोळी महिलांसह लहान मुलांना सोबत घेऊन स्थानक परिसरात वावरत असल्याची माहिती मिळाली. हे महिलासदस्य स्थानकात गर्दीच्या ठिकाणी गोंधळ निर्माण करून प्रवाशांचे लक्ष विचलित करत आणि त्यांचे मोबाईल, पर्स, व अन्य वस्तू चोरत असत.
Gold Rate
05 May 2025
पोलिसांनी सोमवारी सकाळी खास सापळा रचून या चार महिलांना अटक केली. अटक करण्यात आलेल्या महिलांची नावे गीता सोलंकी, नीता सोलंकी, सोनिया सोलंकी आणि मीनू सोलंकी अशी असून त्या सर्व भावनगरच्या रहिवासी आहेत. त्यांच्यासोबत दोन लहान मुलेही होती, जी चोरीदरम्यान उपाय म्हणून वापरली जात होती.
पोलिस तपासादरम्यान या महिलांनी नागपूरसह अहमदाबाद, सूरत, व सिकंदराबाद या मोठ्या रेल्वे स्थानकांवरही चोरीचे प्रकार केले असल्याची कबुली दिली आहे. त्यांच्याविरोधात विविध शहरांमध्ये चोरीचे गुन्हे नोंदवले गेले आहेत. सद्यस्थितीत पोलिस अधिक तपास करत आहेत.
