नागपूर — तब्बल दोन वर्षे कुलगुरू पद रिक्त राहिल्यानंतर राष्ट्रसंत तुकडोजी महाराज नागपूर विद्यापीठाला अखेर स्थायी नेतृत्व लाभले आहे. विद्यापीठाच्या इतिहासात प्रथमच एका महिला शिक्षणतज्ज्ञाची कुलगुरूपदी नियुक्ती झाली असून, डॉ. मनाली मकरंद क्षीरसागर या RTMNU च्या २५व्या कुलगुरू बनल्या आहेत. या ऐतिहासिक नियुक्तीमुळे विद्यापीठात नव्या ऊर्जेचा, पारदर्शकतेचा आणि सुधारयुगाच्या प्रारंभाचा विश्वास व्यक्त केला जात आहे.
राज्यपाल आणि कुलाधिपती यांनी यशवंतराव चव्हाण अभियांत्रिकी महाविद्यालयातील तांत्रिक संचालक व सल्लागार डॉ. मनाली क्षीरसागर यांच्या नियुक्तीला मंजुरी दिली आहे. महिला कुलगुरू म्हणून पहिल्यांदाच मिळालेल्या या जबाबदारीमुळे शैक्षणिक व विद्यार्थीवर्गात समाधान आणि आनंदाचे वातावरण आहे.
Gold Rate
02 dec 2025
गत दोन वर्षांपासून विद्यापीठ कार्यवाहक व्यवस्थेवर चालत होते. स्थायी नेतृत्वाच्या अभावामुळे अनेक महत्त्वाचे निर्णय प्रलंबित राहिले होते आणि प्रशासकीय गती मंदावली होती. विद्यार्थ्यांपासून शिक्षकांपर्यंत सर्वांनीच सक्षम व स्थिर नेतृत्वाची मागणी सातत्याने केली. एनएसयूआयसह अनेक विद्यार्थी संघटनांनी नियुक्तीतील विलंबाविरोधात आंदोलनेही केली होती.
आता डॉ. क्षीरसागर पदभार स्वीकारताच विद्यापीठातील ठप्प प्रक्रियेला वेग मिळेल, अशी अपेक्षा व्यक्त होत आहे. शैक्षणिक सुधारणा, संशोधनाला चालना, नवकल्पनांना प्रोत्साहन, अपूर्ण निर्णयांना अंतिम रूप देणे आणि प्रशासन अधिक पारदर्शक बनवणे ही काही प्रमुख आव्हाने त्यांच्या पुढे आहेत.
विद्यार्थी आणि शिक्षकवर्गाने एकमुखाने आशा व्यक्त केली आहे की डॉ. क्षीरसागर यांच्या नेतृत्वाखाली नागपूर विद्यापीठ पुन्हा शैक्षणिक गुणवत्तेची नवीन मानके निर्माण करेल आणि प्रलंबित मुद्द्यांचे निराकरण जलदगतीने होईल.
