नागपूर – शहरात आज ईद-उल-मिलादचा पर्व श्रद्धा, उत्साह आणि भक्तिभावाच्या वातावरणात साजरा केला जात आहे. ईद-उल-मिलाद निमित्त शहरातील विविध भागांत धार्मिक कार्यक्रम तसेच जुलूसाचे आयोजन करण्यात आले आहे. या पार्श्वभूमीवर कायदा व सुव्यवस्था अबाधित राहावी आणि पर्व शांततेत पार पडावे, यासाठी नागपूर पोलीस प्रशासनाने व्यापक सुरक्षा व्यवस्था केली आहे.

शहरातील प्रमुख जुलूस मार्ग, धार्मिक स्थळे आणि संवेदनशील भागांमध्ये पोलिसांचा विशेष बंदोबस्त ठेवण्यात आला आहे. शहरभरात ६०० हून अधिक पोलीस कर्मचारी आणि १०० पेक्षा अधिक अधिकारी तैनात करण्यात आले आहेत. जुलूसाच्या मार्गावर गर्दीचे नियोजन, वाहतूक व्यवस्था आणि सुरक्षेच्या दृष्टीने पोलिसांकडून विशेष खबरदारी घेतली जात आहे.

Gold Rate

Aug 26 ,2026 - Time 10.30Hrs

Gold 24 KT ₹ 1 62,400 /-

Gold 22 KT ₹ 1,50,700 /-

Silver/Kg ₹ 2,45,800/-

Platinum ₹ 88,000/-

Recommended rate for Nagpur sarafa Making charges minimum 13% and above

जुलूस मार्गांवर विशेष नजर-
ईद-उल-मिलादच्या पार्श्वभूमीवर निघणाऱ्या जुलूसांदरम्यान मोठ्या प्रमाणात नागरिक सहभागी होण्याची शक्यता असल्याने पोलिसांनी जुलूस मार्गांवर विशेष लक्ष केंद्रित केले आहे. गर्दीच्या ठिकाणी पोलीस कर्मचारी तैनात करण्यात आले असून, संशयास्पद हालचालींवरही बारकाईने नजर ठेवली जात आहे.

शहरातील संवेदनशील भागांमध्ये अतिरिक्त बंदोबस्त ठेवण्यात आला असून, परिस्थितीनुसार तातडीने कारवाई करता यावी यासाठी पोलीस यंत्रणा सज्ज ठेवण्यात आली आहे. जुलूस शांततेत पार पडावा आणि नागरिकांना कोणत्याही प्रकारचा त्रास होऊ नये, यासाठी पोलीस आणि प्रशासनाकडून समन्वयाने नियोजन करण्यात आले आहे.

वाहतूक व्यवस्थेवरही लक्ष-
जुलूसाच्या पार्श्वभूमीवर काही प्रमुख रस्त्यांवर नागरिकांची मोठी गर्दी होण्याची शक्यता आहे. त्यामुळे वाहतुकीवर परिणाम होऊ नये यासाठी वाहतूक पोलिसांकडूनही आवश्यक नियोजन करण्यात आले आहे. जुलूस मार्गावर वाहनांची गर्दी होऊ नये तसेच आपत्कालीन परिस्थितीत रस्ते मोकळे ठेवता यावेत, यासाठी विशेष उपाययोजना करण्यात येत आहेत.

नागरिकांना प्रशासनाचे आवाहन-
ईद-उल-मिलाद हा बंधुभाव, शांतता आणि एकतेचा संदेश देणारा पर्व असल्याने नागरिकांनी सामाजिक सलोखा कायम ठेवत उत्सव साजरा करावा, असे आवाहन प्रशासनाने केले आहे. अफवा किंवा सोशल मीडियावरील अप्रमाणित माहितीवर विश्वास ठेवू नये तसेच कोणतीही संशयास्पद बाब आढळल्यास तातडीने पोलिसांना माहिती द्यावी, असेही प्रशासनाकडून सांगण्यात आले आहे.

नागपूर शहरातील नागरिकांनी पोलिसांना सहकार्य करून जुलूस आणि धार्मिक कार्यक्रम शांततेत पार पाडावेत, असे आवाहन करण्यात आले आहे. पोलीस प्रशासनाच्या कडेकोट बंदोबस्तामुळे ईद-उल-मिलादचा पर्व शांततापूर्ण आणि सुरक्षित वातावरणात पार पडण्याची अपेक्षा व्यक्त केली जात आहे.