नागपूर : ह्युंडई मोबिस इंडिया फाउंडेशनच्या वतीने आज नागपुरातील धंतोली येथील कॉम्पोझिट रिजनल सेंटर (सीआरसी) येथे दिव्यांग व्यक्तींना सहाय्यक गतिशीलता उपकरणांचे वितरण करण्यात आले. हा उपक्रम जिल्हा परिषद नागपूर आणि निओमोशन यांच्या संयुक्त विद्यमाने आयोजित करण्यात आला.
कार्यक्रमात दिव्यांग लाभार्थ्यांच्या गरजेनुसार व्हीलचेअर, सहाय्यक गतिशीलता साधने आणि इतर आवश्यक उपकरणांचे वाटप करण्यात आले. या माध्यमातून दिव्यांगांना अधिक स्वावलंबी बनविणे, त्यांचा आत्मविश्वास वाढविणे आणि दैनंदिन जीवनातील कामे सुलभ करणे हा उपक्रमाचा प्रमुख उद्देश असल्याचे आयोजकांनी सांगितले.
यावेळी उपस्थित मान्यवरांनी दिव्यांगांच्या सक्षमीकरणासाठी शासन, सामाजिक संस्था आणि उद्योग समूहांनी अशा उपक्रमांमध्ये सातत्याने योगदान देण्याची गरज व्यक्त केली.दिव्यांग व्यक्तींना त्यांच्या गरजेनुसार सहाय्यक उपकरणे उपलब्ध करून देत त्यांना स्वावलंबी बनविण्याचा आमचा प्रयत्न आहे. समाजाच्या मुख्य प्रवाहात त्यांचा सहभाग अधिक प्रभावी व्हावा, हा या उपक्रमामागील उद्देश आहे.
