मुख्यमंत्री देवेंद्र फडणवीस यांनी आई व पत्नीसोबत केले मतदान

नागपूर: राज्याचे मुख्यमंत्री देवेंद्र फडणवीस यांनी आज आई सरिता व पत्नी अमृता यांच्यासमवेत लोकसभा विधानसभेच्या निवडणुकीत मतदानाचा हक्क बजावला. नागपुरात सकाळी सात वाजता सरसंघचालक मोहन भागवत यांनी मतदान केले होते.

त्यानंतर भाजपाचे उमेदवार नितीन गडकरी यांनी पत्नी व कुटुंबियांसह मतदानाचे राष्ट्रीय कर्तव्य पार पाडले होते. मुख्यमंत्री मतदानासाठी केव्हा येणार याबाबत नागरिकांत उत्सुकता होती. अखेरीस दुपारी बारानंतर मुख्यमंत्री आपल्या आई व पत्नीसह मतदान केंद्रावर पोहचले व त्यांनी मतदान केले.

नागपुरात उन्हाचा तडाखा जाणवतो आहे. गेल्या दोन दिवसांपासून येथील तापमान ४० अंशाहून अधिक नोंदविले जात आहे. दुपारच्यावेळी बाहेर पडणे दुरापास्त झाले आहे. मात्र या उन्हाची फिकिर न करता नागरिक मोठ्या संख्येने मतदान करताना दिसत आहेत.