मुंबई :राष्ट्रवादी काँग्रेस (शरद पवार गट) मध्ये महत्त्वाचा बदल झाला असून, पक्षाचे ज्येष्ठ नेते जयंत पाटील यांनी प्रदेशाध्यक्ष पदाचा राजीनामा दिला आहे. गेल्या काही महिन्यांपासून त्यांनी या पदावरून निवृत्त होण्याचे संकेत दिले होते. आता त्यांनी स्वतःहून ही जबाबदारी सोडल्याने, नवे नेतृत्व पुढे येण्याचा मार्ग मोकळा झाला आहे. त्यांच्या जागी माजी मंत्री शशिकांत शिंदे यांची निवड झाली असून, 15 जुलै रोजी ते अधिकृतपणे पदभार स्वीकारणार आहेत.
सात वर्षांच्या कारकिर्दीचा समारोप-
जयंत पाटील हे शरद पवार गटाचे एक निष्ठावान आणि प्रभावशाली नेतृत्व मानले जात होते. राष्ट्रवादी काँग्रेसच्या फाटाफुटीनंतर त्यांनी शरद पवार यांच्यासोबत राहणं पसंत केलं. गेल्या सात वर्षांपासून त्यांनी प्रदेशाध्यक्षपदाची जबाबदारी सांभाळली आणि पक्षाच्या अनेक निर्णायक क्षणांना सामोरे गेले. नुकत्याच पार पडलेल्या पक्षाच्या वर्धापन दिन सोहळ्यात त्यांनी नव्या नेतृत्वाला संधी दिली पाहिजे, अशी सूचक भूमिका घेतली होती.
Gold Rate
20 dec 2025
शिंदे यांना मोठी संधी-
जयंत पाटील यांच्या जागी पक्षाच्या प्रदेशाध्यक्षपदी शशिकांत शिंदे यांची नियुक्ती करण्यात आली आहे. पक्षातील गडद अनुभव, कार्यकर्त्यांशी नाळ, आणि संघटन कौशल्य यामुळे त्यांची निवड झाल्याचं सांगितलं जातं. शिंदे यांनी याआधीही अनेक जबाबदाऱ्या यशस्वीरित्या पार पाडल्या असून, ते पक्षातील विश्वासार्ह चेहरा म्हणून ओळखले जातात.
शशिकांत शिंदे यांची प्रतिक्रिया-
नव्या जबाबदारीबाबत प्रतिक्रिया देताना शिंदे म्हणाले, “पवार साहेबांच्या नेतृत्वाखाली पक्षाचे प्रदेशाध्यक्ष होणं हे माझ्यासाठी भाग्याचं आहे. ही संधी मिळणं ही मोठी गोष्ट आहे.” त्यांनी जयंत पाटील यांच्या कामगिरीचंही कौतुक करत, “त्यांच्या संयमी नेतृत्वामुळे पक्षाने अनेक कठीण प्रसंगांवर यशस्वीरित्या मात केली,” असं नमूद केलं.
नव्या नेतृत्वाकडून अपेक्षा वाढल्या-
जयंत पाटील यांच्या राजीनाम्यानंतर पक्षात नवा अध्याय सुरू झाल्याचं मानलं जात आहे. पक्षातील काही अस्वस्थ नेत्यांनी अजित पवार गटाकडे झुकाव दाखवल्याने, शरद पवार गटाच्या एकजुटीबाबत प्रश्न निर्माण झाले होते. शरद पवार यांनी भाजपसोबत युतीला स्पष्ट विरोध दर्शवल्यानंतर, नेतृत्वाबाबत नवी दिशा निश्चित करणं गरजेचं होतं. अशा स्थितीत शिंदे यांच्या नावाची घोषणा ही पक्षासाठी एक नवी सुरुवात ठरेल, अशी अपेक्षा व्यक्त होत आहे.
जयंत पाटील पुढे काय भूमिका घेणार, आणि शिंदे कोणती दिशा दाखवणार, याकडे आता सर्वांचे लक्ष लागले आहे. हा नेतृत्वबदल पक्षासाठी निर्णायक ठरण्याची शक्यता आहे.
