नागपूर : दक्षिण मध्य क्षेत्र सांस्कृतिक केंद्र, नागपूर यांच्या वतीने रविवारी, ११ ऑक्टोबर २०२६ रोजी सकाळी ६.३० वाजता ‘ब्रह्मनाद’ या प्रातःकालीन संगीत सभेचे आयोजन करण्यात आले आहे. केंद्राच्या परिसरात होणाऱ्या या कार्यक्रमात प्रसिद्ध हिंदुस्थानी शास्त्रीय गायिका विदुषी नंदिनी नरेंद्र बेडेकर यांचे विशेष गायन सादर होणार आहे. नागपूरमधील कलाप्रेमींच्या आग्रहास्तव या संगीत सभेचे पुन्हा आयोजन करण्यात आले असून, कार्यक्रम सर्वांसाठी विनामूल्य आहे.
विदुषी नंदिनी बेडेकर या गानसरस्वती किशोरी आमोणकर यांच्या ज्येष्ठ शिष्यांपैकी एक आहेत. त्यांनी सुमारे ३५ वर्षे गुरूंच्या मार्गदर्शनाखाली जयपूर-अत्रौली घराण्याच्या शास्त्रीय संगीताचे शिक्षण घेतले आहे. देश-विदेशातील विविध प्रतिष्ठित संगीत महोत्सवांत त्यांनी गायन सादर केले असून, संगीत शिक्षणाच्या क्षेत्रातही त्या योगदान देत आहेत. ‘ब्रह्मनाद’च्या माध्यमातून रसिकांना सकाळच्या प्रसन्न वातावरणात अभिजात शास्त्रीय संगीताचा आनंद घेता येणार आहे.
दरम्यान, केंद्राच्या परिसरात ११ ऑक्टोबर २०२६ ते ३१ मार्च २०२७ या कालावधीत काष्ठशिल्प प्रदर्शन व विक्रीचे आयोजन करण्यात आले आहे. केंद्राच्या जुन्या प्रशासकीय इमारतीत हे प्रदर्शन भरविण्यात येणार असून, ब्रह्मनाद कार्यक्रमानंतर विदुषी नंदिनी बेडेकर आणि सेवानिवृत्त वरिष्ठ आयआरएएस अधिकारी अजित सक्सेना यांच्या हस्ते उद्घाटन होईल.
काही काळापूर्वी आलेल्या भीषण वादळामुळे केंद्र परिसरातील अनेक झाडे उन्मळून पडली होती. या झाडांच्या लाकडाचा सर्जनशील वापर करण्यासाठी छत्तीसगडमधील आदिवासी काष्ठशिल्प कलाकारांना आमंत्रित करण्यात आले होते. या कलाकारांनी पडलेल्या झाडांच्या लाकडापासून विविध आकर्षक कलाकृती तयार केल्या आहेत. या प्रदर्शनातून पर्यावरण संवर्धन, पुनर्वापर आणि आदिवासी कलाकौशल्य यांचा सुंदर संगम पाहायला मिळणार असून, सर्व कलाकृती विक्रीसाठीही उपलब्ध असतील.
दक्षिण मध्य क्षेत्र सांस्कृतिक केंद्राच्या संचालिका आस्था कार्लेकर यांनी कला रसिक, विद्यार्थी आणि नागरिकांना संगीत सभा तसेच काष्ठशिल्प प्रदर्शनाला मोठ्या संख्येने उपस्थित राहण्याचे आवाहन केले आहे.
