नागपूर : शहरातील गजबजलेल्या शताब्दी चौकात वाहतूक नियमभंगावर कारवाई करत असताना एका संतप्त तरुणाने महिला वाहतूक पोलिसावर हल्ला केल्याची धक्कादायक घटना घडली. या प्रकारामुळे काही काळ परिसरात तणावाचे वातावरण निर्माण झाले होते.
माहितीनुसार, अजनी वाहतूक विभागातील महिला हवालदार मालती आत्माराम पाल (५६) या सहकाऱ्यासह शताब्दी चौकात वाहतूक नियंत्रणाचे काम करत होत्या. त्यावेळी वाहतूक नियमांचे उल्लंघन करणाऱ्या दुचाकीस्वार इंजमामुल कलीम खान (३३, रा. सुंदरनगर, खरबी) याला थांबवून दंडात्मक कारवाई सुरू करण्यात आली.
Gold Rate
May 07- 2026 - Time 10.30Hrs
कारवाई सुरू होताच संबंधित तरुण संतापला. त्याने महिला पोलिसांसोबत वाद घालत शिवीगाळ केली तसेच धमकी देण्यास सुरुवात केली. परिस्थिती अधिक चिघळल्यानंतर आरोपीने जवळ पडलेली बोरी उचलून थेट महिला हवालदारांच्या डोक्यावर फेकली.
अचानक झालेल्या या हल्ल्यामुळे चौकात एकच गोंधळ उडाला. उपस्थित नागरिकांनी तत्काळ हस्तक्षेप करत परिस्थिती नियंत्रणात आणण्याचा प्रयत्न केला. आरोपीने महिला पोलिसांच्या सहकाऱ्याशीही अरेरावी केल्याचे सांगितले जात आहे.
घटनेची माहिती मिळताच अजनी पोलिसांनी घटनास्थळी धाव घेत आरोपीविरुद्ध शासकीय कामात अडथळा आणणे, धमकी देणे आणि हल्ला केल्याप्रकरणी गुन्हा दाखल केला आहे. पुढील तपास सुरू आहे.
महिला पोलिसांच्या सुरक्षेचा प्रश्न पुन्हा ऐरणीवरभरदिवसा ड्युटीवर असलेल्या महिला वाहतूक पोलिसावर झालेल्या या हल्ल्यामुळे शहरातील पोलिसांच्या सुरक्षिततेबाबत चिंता व्यक्त केली जात आहे. नागरिकांकडून आरोपीवर कठोर कारवाईची मागणी होत आहे.
