नागपूर : शहरातील सोनेगाव परिसरात एका विवाहित महिलेने धर्मांतरासाठी दबाव टाकणे, आक्षेपार्ह व्हिडिओच्या माध्यमातून ब्लॅकमेल करणे आणि आर्थिक फसवणूक केल्याचे गंभीर आरोप करत पोलिसांत तक्रार दाखल केली आहे. या प्रकरणात सोनेगाव पोलिसांनी गुन्हा नोंदवत दोन आरोपींना अटक केली असून, एक आरोपी अद्याप फरार आहे.
तक्रारीनुसार, महिलेच्या एका माजी वर्गमित्राने तिला गुंगीचे औषध देऊन हॉटेलमध्ये नेले आणि तिच्यावर अत्याचार केल्याचा आरोप आहे. त्यानंतर तिचे आक्षेपार्ह व्हिडिओ तयार करून ते व्हायरल करण्याची धमकी देत दीर्घकाळ शोषण करण्यात आल्याचे महिलेने म्हटले आहे.
महिलेचा आरोप आहे की, आरोपींनी तिच्यावर धर्मांतरासाठी सतत दबाव टाकला. तसेच विविध कारणे सांगून तिच्याकडून तीन लाख रुपयांहून अधिक रक्कम उकळण्यात आली. काही धार्मिक आणि कथित तांत्रिक विधींच्या नावाखाली मानसिक छळ केल्याचाही आरोप तिने केला आहे.
या प्रकरणात अय्याज ताज मदारे आणि आमीन शेख यांना पोलिसांनी अटक केली आहे. तर हजरत मौलाना नावाचा आरोपी फरार असून त्याचा शोध सुरू आहे.
पोलिसांनी आरोपींविरुद्ध बलात्कार, धर्मांतराचा प्रयत्न, आर्थिक शोषण तसेच महाराष्ट्र नरबळी व इतर अमानवीय, अघोरी प्रथा आणि काळी जादू प्रतिबंधक कायद्यांतर्गत गुन्हे दाखल केले आहेत. मोबाईल चॅट, सीसीटीव्ही फुटेज, आर्थिक व्यवहार आणि इतर इलेक्ट्रॉनिक पुरावे तपासले जात आहेत.
दरम्यान, न्यायालयाने अटक करण्यात आलेल्या दोन्ही आरोपींना पाच दिवसांची पोलीस कोठडी सुनावली असून, फरार आरोपीचा शोध घेण्यासाठी पोलिसांची विशेष पथके कार्यरत आहेत.
