नागपूर टुडे – नागपूर शहरात गुन्हेगारी प्रवृत्तीच्या व्यक्तींविरुद्ध कारवाई करण्यासाठी गिट्टीखदान पोलिसांनी राबविलेल्या शोधमोहिमेदरम्यान एका संशयिताकडून गावठी अग्निशस्त्र आणि दोन जिवंत काडतुसे जप्त केली. वेदप्रकाश लालजी मिश्रा (वय ३५) असे अटक करण्यात आलेल्या आरोपीचे नाव आहे. या कारवाईत पोलिसांनी मॅगझीनसह गावठी अग्निशस्त्र आणि दोन जिवंत काडतुसे असा एकूण २५ हजार ६०० रुपयांचा मुद्देमाल जप्त केला.
मिळालेल्या गोपनीय माहितीवरून कारवाई
पोलिसांनी दिलेल्या माहितीनुसार, १० ऑक्टोबर २०२६ रोजी मध्यरात्री १ ते २ वाजताच्या सुमारास गिट्टीखदान पोलीस ठाण्याचे पथक गुन्हेगार शोधमोहीम राबवत होते. याचदरम्यान सुरेंद्रगड परिसरातील राधाकृष्ण मंदिराजवळ राहणाऱ्या एका व्यक्तीकडे अग्निशस्त्र असल्याची खात्रीशीर माहिती पोलिसांना मिळाली.
या माहितीच्या आधारे पोलिसांनी वेदप्रकाश लालजी मिश्रा याच्या घरी धाव घेतली. पंचांसमक्ष घराची झडती घेतली असता, त्याच्या बेडरूममधील पलंगावरील उशीखाली मॅगझीनसह एक लोखंडी गावठी अग्निशस्त्र आणि दोन जिवंत काडतुसे आढळून आली. पोलिसांनी तातडीने हा मुद्देमाल जप्त करून आरोपीला ताब्यात घेतले.
आर्म्स अॅक्टनुसार गुन्हा दाखल
आरोपीकडे अग्निशस्त्र आणि जिवंत काडतुसे आढळून आल्याने तसेच प्रतिबंधात्मक आदेशाचे उल्लंघन केल्याच्या आरोपावरून गिट्टीखदान पोलीस ठाण्यात भारतीय शस्त्र अधिनियमाच्या कलम ३ व २५ तसेच महाराष्ट्र पोलीस अधिनियमाच्या कलम १३५ अन्वये गुन्हा दाखल करण्यात आला आहे. आरोपीला अटक करण्यात आली असून, या अग्निशस्त्राचा वापर कोणत्या उद्देशाने केला जाणार होता, यासह अन्य बाबींचा पोलीस तपास करीत आहेत.
वरिष्ठ अधिकाऱ्यांच्या मार्गदर्शनाखाली कारवाई
ही कारवाई नागपूर शहराचे पोलीस आयुक्त श्री. विश्वास नांगरे पाटील, सहपोलीस आयुक्त श्री. नवीनचंद्र रेड्डी, अपर पोलीस आयुक्त (उत्तर प्रभाग) श्रीमती विनिता शाहू, पोलीस उपायुक्त (परिमंडळ क्र. २) श्रीमती अन्नपूर्णा सिंह आणि सहायक पोलीस आयुक्त (सदर विभाग) श्री. शिवाजी गायकवाड यांच्या मार्गदर्शनाखाली करण्यात आली.
या कारवाईत वरिष्ठ पोलीस निरीक्षक सारंग मिराशी, सहायक पोलीस निरीक्षक लालपालवाले, पोलीस उपनिरीक्षक खुशाल राठोड, पोलीस हवालदार संदीप चनगोले, बालकृष्ण राठोड आणि पोलीस अंमलदार रमेश बंजारा यांनी सहभाग घेतला.
या प्रकरणाचा पुढील तपास गिट्टीखदान पोलीस करीत आहेत.
