नागपूर : पेट्रोलमध्ये इथेनॉलचे प्रमाण वाढवण्याच्या केंद्र सरकारच्या धोरणाविरोधात नागपुरात मंगळवारी आम आदमी पक्षाने जोरदार आंदोलन छेडले. केंद्रीय रस्ते वाहतूक व महामार्ग मंत्री नितीन गडकरी यांच्या महाल येथील निवासस्थानाकडे मोर्चा काढण्याचा प्रयत्न करण्यात आला. मात्र, पोलिसांनी आंदोलकांना आधीच अडवत त्यांना ताब्यात घेतले.
महाल परिसरातील छत्रपती शिवाजी महाराजांच्या पुतळ्याजवळ दुपारी आंदोलक मोठ्या संख्येने एकत्र आले. हे ठिकाण गडकरी यांच्या निवासस्थानापासून सुमारे १५० मीटर अंतरावर असल्याने परिसरात मोठा पोलीस बंदोबस्त तैनात करण्यात आला होता. आंदोलकांनी घोषणाबाजी करत गडकरी निवासाच्या दिशेने मोर्चा नेण्याचा प्रयत्न केला, मात्र पोलिसांनी त्यांना पुढे जाण्यापासून रोखले.
यावेळी केंद्र सरकारच्या इथेनॉल मिश्रण धोरणाविरोधात जोरदार घोषणाबाजी करण्यात आली. हे आंदोलन केंद्रीय मंत्री नितीन गडकरी यांच्या वैयक्तिक विरोधात नसून, पेट्रोलमध्ये इथेनॉलची सक्ती करण्याच्या निर्णयाविरोधात असल्याचे आम आदमी पक्षाचे प्रदेश संघटक भूषण ढाकुलकर यांनी स्पष्ट केले.
आंदोलनामुळे महाल परिसरात काही काळ वाहतुकीवर परिणाम झाला. बाजारपेठेचा भाग असल्याने नागरिकांना ये-जा करताना अडचणींचा सामना करावा लागला. एकीकडे वाहतूक सुरळीत ठेवणे आणि दुसरीकडे आंदोलकांना नियंत्रणात ठेवणे, अशी दुहेरी जबाबदारी पोलिसांवर आली होती. अखेर पोलिसांनी सर्व आंदोलकांना ताब्यात घेत परिस्थिती नियंत्रणात आणली.
दरम्यान, पेट्रोलमध्ये २० टक्के इथेनॉल (E20) मिश्रणाच्या धोरणाला देशातील काही वाहनधारक संघटनांकडून विरोध होत आहे. २०२३ पूर्वीच्या वाहनांमध्ये E20 इंधन वापरल्यास इंजिनवर परिणाम होणे, मायलेज कमी होणे आणि देखभाल खर्च वाढण्याची शक्यता असल्याचा दावा विरोधकांकडून केला जात आहे. त्यामुळे इथेनॉल-मुक्त पेट्रोलचा पर्याय उपलब्ध करून देण्याची मागणी आंदोलनकर्त्यांनी पुन्हा एकदा केली.
