नागपूर: महिला सशक्तीकरणाच्या दिशेने एक मोठे पाऊल उचलत, मुख्यमंत्री देवेंद्र फडणवीस यांनी नागपूरमध्ये ५० पात्र महिला लाभार्थींना पिंक ई-रिक्शांचे वितरण केले. राज्य सरकारच्या महिला व बाल विकास विभागाच्या पुढाकाराने ही योजना राबवण्यात येत असून, महिलांना सुरक्षित प्रवास व रोजगाराच्या संधी देण्याच्या हेतूने ही योजना अत्यंत प्रभावी ठरत आहे.
या कार्यक्रमात महिला व बाल विकास मंत्री आदिती तटकरे, राज्य मंत्री मेघना सकोरे-बोर्डिकर, आमदार संदीप जोशी, आयुक्त नयना गुंडे, जिल्हाधिकारी डॉ. विपिन इटनकर, महामेट्रोचे व्यवस्थापकीय संचालक श्रवण हार्डीकर यांच्यासह अनेक मान्यवर उपस्थित होते.
Gold Rate
24 April 2025
मुख्यमंत्री म्हणाले, राज्य सरकार महिला सशक्तीकरणासाठी कटिबद्ध आहे. ‘पिंक ई-रिक्शा’सारख्या योजनांमुळे गरजूंना रोजगार मिळतोय, तसेच कामकाजी महिलांसाठी सुरक्षित प्रवासाची हमी दिली जातेय. नागपूर जिल्ह्यात ५० महिलांना ई-रिक्शा वितरित करण्यात आल्या असून, पुढील टप्प्यात २ हजार महिलांना या योजनेतून रोजगार देण्याचे उद्दिष्ट आहे.
महामेट्रो व महिला व बाल विकास विभागामध्ये झालेल्या सामंजस्य करारानुसार, या पिंक ई-रिक्शा मेट्रो स्थानकांवर फीडर सेवा म्हणून वापरली जाणार आहे. यामुळे महिलांना नियमित उत्पन्न मिळेल. भविष्यात पर्यटन स्थळे व विमानतळांवरही या सेवांचा विस्तार केला जाणार आहे.
मंत्री आदिती तटकरे यांनी सांगितले की, राज्यातील आठ जिल्ह्यांत या योजनेंतर्गत पहिल्या सहा महिन्यांत पाच हजार ई-रिक्शा वितरित करण्याचे लक्ष्य ठेवले आहे. लाभार्थी महिलांना १० दिवसांचे प्रशिक्षण देण्यात आले असून, पुढील पाच वर्षांसाठी देखभाल व चार्जिंगचीही सुविधा सरकारकडून उपलब्ध करून दिली जाईल.
कार्यक्रमानंतर मुख्यमंत्री फडणवीस यांनी खुद्द एका महिला लाभार्थीच्या पिंक ई-रिक्शामधून प्रवास करून महिलांच्या आत्मविश्वासात भर घातली. त्यांच्यासोबत मंत्री तटकरे आणि मेघना सकोरे-बोर्डिकरही होत्या.
