नागपूर: गणेशपेठ पोलिस स्टेशनच्या हद्दीत असलेल्या गरिखाना कॉम्प्लेक्समध्ये एकतर्फी प्रेमाच्या वादातून 24 वर्षीय अमन मेश्रामची निर्घृण हत्या झाल्याची हादरवणारी घटना मंगळवारी रात्री घडली. अमन हा गंगाबाई घाट चौकात राहणारा असून चाकूच्या वारांमुळे त्याचा मृत्यू झाला. पोलिसांनी आरोपीला ताब्यात घेतले आहे.
मैत्रीचे नाते जीव घेणारे ठरले-
अमनची गरिखाना कॉम्प्लेक्समधील एका तरुणीशी ओळख होती. तो तिच्यावर अत्यंत प्रेम करीत होता; परंतु ती त्याच्याशी कोणतेही नाते जोडण्यास तयार नव्हती. दुसरीकडे, आरोपी हिंगणा येथील गुमगाव भागात असलेल्या एका ढाब्यावर काम करतो. त्याची हेमंत नावाच्या युवकासोबत मैत्री झाली होती आणि हेमंतची मैत्रीण ही अमनच्या मित्राची ओळखीची असल्याने सर्वजण एकमेकांच्या संपर्कात आले.
Gold Rate
26 Oct 2025
अमनला या मैत्रीबद्दल समजल्यावर त्याने त्या तरुणीवर दबाव आणण्यास आणि तिला धमकावण्यास सुरुवात केली. तिच्या इतरांशी असलेल्या संबंधांना तो विरोध करीत होता.
शेतातल्या वादातून चाकूचा घातक हल्ला-
मंगळवारी रात्री दहाच्या सुमारास अमनने मुलीला फोन करून आरोपीशी भेटण्यास सांगितले. तिघेही रामकुलजवळील शेतात बोलत बसले असताना वाद वाढला. रागाच्या भरात अमनने त्या मुलीला काही चापट मारल्या. हे पाहून आरोपी संतापला आणि त्याने खिशातील चाकू काढून अमनच्या पोटात वार केले. अमन रक्तबंबाळ होताच आरोपी तिथून पसार झाला.
रुग्णालयात पोहचताच मृत घोषित-
गणेशपेठ पोलिस तत्काळ घटनास्थळी पोहोचले. अमनला तात्काळ रुग्णालयात नेण्यात आले; मात्र डॉक्टरांनी त्याला मृत घोषित केले. पोलिसांनी तातडीने आरोपीचा शोध घेऊन त्याला अटक केली. घटनास्थळी पंचनामा करून पुढील तपास सुरू आहे.
या घटनेमुळे परिसरात भीतीचे वातावरण निर्माण झाले असून, एकतर्फी प्रेमातून घडणाऱ्या वाढत्या गुन्ह्यांबाबत नागरिकांमध्ये चिंता व्यक्त केली जात आहे.
