नागपूर : नागपूर जिल्ह्यातील हिंगणा परिसरात समृद्धी महामार्ग सर्कलजवळ लोखंडी पाइपने भरलेला ट्रेलर पलटी झाल्याने भीषण अपघात घडला. या दुर्घटनेत ट्रकच्या २९ वर्षीय सहाय्यकाचा उपचारादरम्यान मृत्यू झाला, तर चालक जखमी झाला. अपघातानंतर दोघेही वाहनाच्या केबिनमध्ये अडकले होते. क्रेनच्या मदतीने बचावकार्य करून त्यांना बाहेर काढण्यात आले.
मिळालेल्या माहितीनुसार, हिंगणा पोलीस ठाण्याच्या हद्दीत समृद्धी महामार्ग सर्कलजवळील ११व्या किलोमीटरवर बुधवारी रात्री हा अपघात झाला. उत्तर प्रदेशातील नोंदणी क्रमांक असलेला लोखंडी पाइपने भरलेला ट्रेलर (क्रमांक UP 78 KN 2396) अचानक पलटी झाला. यामुळे ट्रकमधील जड पाइप रस्त्यावर विखुरले आणि चालक शैलेंद्र सिंह (३७) व त्याचा सहाय्यक संजय यादव (२९) केबिनमध्ये अडकले.
घटनेची माहिती मिळताच बचावकार्य सुरू करण्यात आले. क्रेनच्या साहाय्याने पाइप बाजूला करून दोघांनाही बाहेर काढण्यात आले आणि उपचारासाठी एम्स रुग्णालयात दाखल करण्यात आले. मात्र, उपचारादरम्यान कानपूर, उत्तर प्रदेश येथील रहिवासी असलेल्या संजय यादव याचा मृत्यू झाला. चालक शैलेंद्र सिंह याच्यावर उपचार सुरू आहेत.
या प्रकरणी महामार्ग पोलिसांचे हवालदार ओमप्रकाश पवार यांच्या तक्रारीवरून हिंगणा पोलिसांनी ट्रकचालकाविरुद्ध गुन्हा दाखल केला आहे. भरधाव वेग आणि निष्काळजीपणे वाहन चालवल्यामुळे हा अपघात झाल्याचा प्राथमिक अंदाज पोलिसांनी व्यक्त केला असून, पुढील तपास सुरू आहे.
