नागपूर : शहरात पुन्हा एकदा धाडसी चोरीची घटना समोर आली असून, कामठी तालुक्यातील खैरि परिसरात मेट्रो प्रकल्पासाठी वापरले जाणारे सुमारे १७ लाख रुपयांचे बांधकाम साहित्य चोरट्यांनी लंपास केले आहे. ही घटना ओल्ड कामठी पोलीस ठाण्याच्या हद्दीत घडली.
तक्रारदार तुषार प्रकाश कुहिटे (वय २४), हे एका खासगी सुरक्षा कंपनीत सुरक्षा पर्यवेक्षक म्हणून कार्यरत असून, ते खैरि येथील मेट्रो कंत्राटदार कंपनीच्या ठिकाणी ड्युटीवर होते. त्यांच्या तक्रारीनुसार, ६ एप्रिल २०२६ रोजी रात्री सुमारे ११ वाजताच्या सुमारास खैरि गावाजवळील कामठी पुलासमोरील मेट्रोच्या पिलर क्रमांक १३० जवळ ही चोरी घडली.
Gold Rate
Apr 06,2026 - Time 10.30Hrs
पोलिसांनी दिलेल्या माहितीनुसार, अज्ञात आरोपी एका आयशर ट्रक (MH-22 AA 1897) आणि मोटारसायकल (MH-40 CY 2303) घेऊन घटनास्थळी आले. त्यांनी पियर कॅप प्लेट्स आणि कॅप टॉप साईड शटरिंगसह लोखंडी साहित्य ट्रकमध्ये भरायला सुरुवात केली.
दरम्यान, तेथील सुरक्षा रक्षकाच्या लक्षात हा प्रकार येताच त्याने आरडाओरडा केला. यामुळे घाबरलेल्या आरोपींनी मोटारसायकल जागीच सोडून दिली आणि ट्रकमधून चोरीचा मुद्देमाल घेऊन पळ काढला.
या प्रकरणी ओल्ड कामठी पोलिसांनी भारतीय न्याय संहितेच्या संबंधित कलमान्वये अज्ञात आरोपींविरुद्ध गुन्हा दाखल केला असून, फरार आरोपींचा शोध घेण्यासाठी तपास सुरू आहे.
