नागपूर : संपत्ती आणि घर आपल्या नावावर करून घेण्याच्या लालसेने एका मुलाने माणुसकीचा पूर्णत: विसर टाकला. नागपूरच्या रमणा मारुती परिसरात (नंदनवन पोलीस ठाण्याच्या हद्दीत) एका ५३ वर्षीय मुलाने स्वतःच्या ७८ वर्षीय वडिलांचा गळा कटरने चिरला आणि ७५ वर्षीय आईलाही निर्दयपणे मारहाण केली.
या हल्ल्यात वडील गंभीर जखमी झाले असून आरोपी मुलगा प्रमोद पांडे (वय ५३) याच्यावर नंदनवन पोलिसांनी खुनाच्या प्रयत्नाचा गुन्हा दाखल केला आहे. जखमी वृद्ध दांपत्याची नावे माधव पांडे (वय ७८) आणि शोभा पांडे (वय ७५) अशी आहेत. माधव पांडे हे निवृत्त सरकारी कर्मचारी आहेत.
कौटुंबिक वादातून उफाळला संताप-
या कुटुंबात पती-पत्नींसोबत दोन मुलगे आणि दोन मुली आहेत. मुलींचे विवाह झाले आहेत. काही दिवसांपूर्वीच एका मुलाचे निधन झाले होते. त्या घटनेनंतर प्रमोद मानसिक तणावाखाली आणि दारूच्या नशेत वारंवार आई-वडिलांशी भांडत होता.
तो वारंवार घर आणि संपत्ती आपल्या नावावर करून देण्याची मागणी करत होता. मात्र त्याच्या व्यसनाधीन स्वभावामुळे वडिलांनी नकार दिला.
पहाटेच घडला हल्ला-
सोमवारच्या पहाटे पुन्हा घरात वाद झाला. संतापलेल्या प्रमोदने घरातील कटर उचलून वडिलांवर प्राणघातक हल्ला केला.
मध्यस्थी करण्यास आलेल्या आई शोभा पांडे यांनाही त्याने ढकलून मारहाण केली.
घटनेची माहिती मिळताच शेजाऱ्यांनी पोलिसांना कळवले. पोलिसांनी घटनास्थळी धाव घेऊन जखमी वृद्ध दांपत्याला रुग्णालयात दाखल केले.
पोलिसांची कारवाई सुरू-
नंदनवन पोलिसांनी आरोपी प्रमोद पांडे यास ताब्यात घेतले असून भारतीय दंड संहितेच्या कलम ३०७ (खुनाचा प्रयत्न) आणि इतर संबंधित कलमांनुसार गुन्हा दाखल करण्यात आला आहे. पोलिस पुढील तपास करीत आहेत.
स्थानिक रहिवाशांनी सांगितले,माधवजी अतिशय शांत आणि सुस्वभावी आहेत. प्रमोद हा अनेकदा दारूच्या नशेत आई-वडिलांशी भांडत असे. पण या वेळी त्याने माणुसकीचं भान सोडलं.
