दुस-या दिवशी ६४ तक्रारींवर सुनावणी
नागपूर : आयुक्त तुकाराम मुंढे यांच्या जनता दरबाराला पहिल्याच दिवशी उदंड प्रतिसाद मिळाला. अनेकदा तक्रारी करूनही कार्यवाही होत नसताना आयुक्त स्वत: तक्रारींची दखल घेत असल्याची माहिती शहरात पसरताच दुस-या दिवशी गुरूवारी (ता.३०) मनपा आयुक्त कक्षापुढे नागरिकांनी तोबा गर्दी केली. वेळेअभावी सुनावणी न होउ शकणा-या तक्रारी स्वीकारण्यासाठी मनपा आयुक्त स्वत: कक्षाबाहेर आले आणि त्यांनी तक्रार अर्ज स्वीकारले.
Gold Rate
June 04- 2026 - Time 10.30Hrs
नागरिकांच्या तक्रारींसाठी आयुक्त तुकाराम मुंढे यांनी दररोज दुपारी ४ ते सायंकाळी ५ हा वेळ निर्धारित केला. मात्र गुरूवारी (ता.३०) मनपा मुख्यालयातील छत्रपती शिवाजी महाराज नवीन प्रशासकीय इमारतीमधील आयुक्त कक्षापुढे नागरिकांची गर्दी पाहता आयुक्तांना सायंकाळी ६ वाजतापर्यंत वेळ वाढवावा लागला. वेळ वाढवूनही काही तक्रारींवर सुनावणी होउ शकली नाही.
आयुक्तांच्या कक्षाबाहेर नागरिक तक्रारींसह उभे असल्याचे निदर्शनास येताच आयुक्त तुकाराम मुंढे स्वत: कक्षाबाहेर आले व त्यांनी सर्व उर्वरित तक्रारअर्ज स्वीकारले. सुनावणी न झालेल्या प्रत्येक तक्रारींची दखल घेउन त्याचे निराकरण करण्यात येईल, असा विश्वासही त्यांनी यावेळी दिला. गुरूवारी (ता.३०) आयुक्त तुकाराम मुंढे यांनी एकूण ६४ तक्रारी ऐकून घेतल्या.
