नागपूर: वाठोडा दहनघाटावर अंतिम संस्काराच्या वेळी बुधवारी दुपारी हृदय पिळवटून टाकणारी दुर्घटना घडली. चिता प्रज्वलित करण्यासाठी वापरलेल्या डिझेलमुळे अचानक भडका उडाल्याने सहा जण ज्वाळांच्या तावडीत सापडले. यापैकी एकाचा उपचारादरम्यान मृत्यू झाला असून, दोन जणांची प्रकृती अद्याप गंभीर आहे.

सुशीलाबाईंच्या अंत्यसंस्कारावेळी घडला अनर्थ-

वाठोड्यातील रहिवासी सुशीलाबाई हरिभाऊ मुनघाटे (८३) यांचे निधन झाल्यानंतर कुटुंबीयांनी त्यांचे अंतिम संस्कार करण्यासाठी वाठोडा दहनघाटावर चितेची तयारी सुरू केली. वातावरण शांत होते. परंतु पुढच्या काही क्षणांतच सगळा माहोल गोंधळात बदलला.

चितेला डिझेल ओतताच भडकली आग; क्षणात पसरल्या ज्वाळा-

प्रज्ज्वलनासाठी घरच्यांनी चितेवर डिझेल टाकताच आगीचा मोठा भडका उडाला. प्रचंड लाटेसारखी उठलेली आग थेट जवळ उभ्या असलेल्या नातेवाईकांवर झेपावली. काहीच सेकंदांत कपड्यांना आग लागून सहाजण झोंबत्या ज्वाळांत अडकले.

Gold Rate

July 20 ,2026 - Time 10.30Hrs

Gold 24 KT ₹ 1 42,400 /-

Gold 22 KT ₹ 1,32,100 /-

Silver/Kg ₹ 2,20,400/-

Platinum ₹ 88,000/-

Recommended rate for Nagpur sarafa Making charges minimum 13% and above

लपटांमध्ये सहा जण जखमी; परिसरात धावपळ-

जखमी झालेल्यांमध्ये –

विनोद पुंडलीकराव मुनघाटे (६४)
अशोक मुनघाटे
सोपान गायकवाड
ज्ञानेश्वर गायकवाड
विठ्ठल भसारकर
आणि आणखी एक व्यक्ती

ज्वाळांमुळे हे सर्व गंभीररीत्या भाजले. लोकांनी तत्काळ माती, पाणी वापरून आग विझवण्याचा प्रयत्न केला. घटनास्थळी हळहळ, आरडाओरड आणि गोंधळाचे वातावरण निर्माण झाले.

एकाचा मृत्यू; दोन जणांची प्रकृती चिंताजनक-

सर्व जखमींना तातडीने मेडिकल कॉलेज आणि अन्य खाजगी रुग्णालयात हलवण्यात आले. मात्र, गंभीर भाजल्या गेलेल्या विनोद मुनघाटे (६४) यांचा मध्यरात्री उपचारादरम्यान मृत्यू झाला. उर्वरित जखमींपैकी दोन जणांना उपचारानंतर घरी सोडण्यात आले असून, दोन जणांची स्थिती अजूनही गंभीर आहे.

पोलिसांकडून आकस्मिक मृत्युची नोंद; डिझेलच्या वापराची चौकशी-

वाठोडा पोलिसांनी आकस्मिक मृत्यूची नोंद करून तपास सुरू केला आहे. प्राथमिक तपासात चितेवर वापरलेले डिझेलच दुर्घटनेचे प्रमुख कारण असल्याचे संकेत मिळत आहेत. दहनघाटावर सुरक्षा नियमांचे पालन झाले होते की नाही, याचीही तपासणी करण्यात येत आहे.

स्थानिकांची मागणी, दहनघाटांवर कडक सुरक्षा नियम लागू करावेत-

या घटनेनंतर परिसरातील नागरिकांनी दहनघाटांवर अग्निसुरक्षेचे नियम कडक करावेत, तसेच ज्वलनशील पदार्थांच्या वापरावर नियंत्रण आणावे, अशी मागणी केली आहे. सुरक्षित प्रज्ज्वलन पद्धती अनिवार्य केल्यास भविष्यात अशा दुर्घटना टाळता येऊ शकतील, असा नागरिकांचा आवाज आहे.