नागपूर: नागपूर महानगरपालिकेच्या आरोग्य विभागाच्या वतीने एचडीएफसी बँक आणि अर्पण ब्लड बँक यांच्या सहकार्याने आयोजित रक्तदान शिबिराच्या पहिल्याच दिवशी नागरिकांनी उत्स्फुर्त प्रतिसाद दर्शविला. शुक्रवारी (ता. १७) खामला येथील मनपा डिस्पेंसरीमधील रक्तदान शिबिराच्या शुभारंभ प्रसंगी वैद्यकीय आरोग्य अधिकारी डॉ. नरेंद्र बहिरवार, अतिरिक्त वैद्यकीय आरोग्य अधिकारी डॉ. विजय जोशी, माजी नगरसेविका श्रीमती पल्लवी शामकुळे, लक्ष्मीनगर झोनचे झोनल वैद्यकीय आरोग्य अधिकारी डॉ. सुनील कांबळे उपस्थित होते.
मनपा आयुक्त तथा प्रशासक डॉ. अभिजीत चौधरी यांच्या निर्देशानुसार, अतिरिक्त आयुक्त श्रीमती आंचल गोयल यांच्या मार्गदर्शनात मनपाच्या दहाही झोनमध्ये शहरातील विविध ठिकाणी ३० नोव्हेंबरपर्यंत रक्तदान शिबिराचे आयोजन करण्यात येत आहे. आज शुक्रवारपासून (ता.१७ नोव्हेंबर) रक्तदान शिबिराला प्रारंभ झाला असून खामला येथील मनपा डिस्पेंसरी येथे सकाळी १० ते दुपारी ३ या वेळेत रक्तदान शिबिराचे आयोजन करण्यात आले होते.
Gold Rate
23 Jan 2026
१८ नोव्हेंबर रोजी स्व. प्रभाकरराव दटके महाल रोगनिदान केंद्र येथे, २० नोव्हेंबर रोजी कमाल चौक येथील पाचपावली स्त्री रुग्णालय येथे, २१ नोव्हेंबर रोजी चंद्रमणी नगर येथील नवकर बुद्ध विहार येथे, २२ नोव्हेंबर रोजी इंदिरा गांधी रुग्णालय गांधीनगर येथे, २३ नोव्हेंबर रोजी लुंबीनी बुद्ध विहार पंचवटी नगर येथे, २४ नोव्हेंबर रोजी मानेवाडा नागरी प्राथमिक आरोग्य केंद्र येथे, २८ नोव्हेंबर रोजी छावनी सदर येथे स्थित मनपा मंगळवारी झोन कार्यालयामध्ये, २९ नोव्हेंबर रोजी भवानी माता मंदिर परिसर पारडी येथे आणि ३० नोव्हेंबर रोजी नेहरूनगर झोन कार्यालय येथे रक्तदान शिबिरांचे आयोजन करण्यात आले आहे. सर्व रक्तदान शिबिर सकाळी १० ते दुपारी ३ या वेळेत सुरू राहतील.
नागरिकांनी आपल्या नजीकच्या रक्तदान शिबिर स्थळी भेट देउन स्वयंस्फूर्तीने रक्तदान करावे, असे आवाहन मनपा वैद्यकीय आरोग्य अधिकारी डॉ. नरेंद्र बहिरवार यांनी केले आहे.
