Published On : Mon, Jul 2nd, 2018

शिवसेनेचे अनिल परब पुन्हा दुसऱ्यांदा विधानपरिषदेवर

मुंबई : शिवसेनेचे पक्षप्रमुख उद्धव ठाकरे यांनी आमदार अनिल परब यांना पुन्हा एकदा विधान परिषदेवर पाठवण्याचा निर्णय घेतला आहे. मातोश्री येथे रविवारी शिवसेना नेत्यांच्या बैठकीत ठाकरे यांनी त्यांच्या नावावर शिक्कामोर्तब केले आहे. विधान परिषदेच्या ११ जागांसाठी १६ जुलैला मतदान होणार संपन्न होणार आहे.

विधान परिषदेतील राष्ट्रवादीचे चार, काँग्रेसचे तीन, भाजपाचे दोन आणि शेकापचे एक सदस्य निवृत्त होत आहेत. या रिक्त जागांसाठी १६ जुलैला मतदान होणार आहे. विधानसभेतील सध्याच्या पक्षीय संख्याबळानुसार भाजपाच्या वाट्याला पाच, शिवसेनेकडे दोन आणि आघाडी झाल्यास काँग्रेस-राष्ट्रवादीच्या वाट्याला तीन जागा येऊ शकतात. अकराव्या जागेसाठी मात्र जुळवाजुळव करावी लागणार आहे.

शिवसेनेकडे अतिरिक्त मते असल्याने तिसरा उमेदवार देत अकरावी जागा खेचून आणण्याबाबत या बैठकीत सविस्तर चर्चा करण्यात आली. अनिल परब हे उद्धव ठाकरे यांचे अत्यंत विश्वासू सहकारी मानले जातात. मनसेच्या सहा नगरसेवकांना शिवसेनेत आणणे, मुंबई विद्यापीठ सिनेट निवडणूक आणि नुकत्याच झालेल्या मुंबई पदवीधर मतदारसंघातील निवडणुकीत त्यांनी मोलाची भूमिका बजावली होती. त्यामुळे त्यांना पुन्हा एकदा विधान परिषदेवर संधी मिळाली.

दुसऱ्या आणि तिसऱ्या जागेसाठी अन्य नावांचा विचार यावेळी झाला. शिवसेनेचे सचिव आणि उद्धव ठाकरे यांचे स्वीय्य सहाय्यक मिलिंद नार्वेकर यांच्या नावावरही चर्चा झाली.