नागपूर शहर काँग्रेसमध्ये अध्यक्षपदाच्या निवडीभोवती सुरू असलेली राजकीय हालचाल आता निर्णायक टप्प्यात पोहोचली आहे. बराच काळ प्रलंबित असलेला अध्यक्षबदल अखेर मार्गी लागण्याची चिन्हे दिसू लागली असून, पक्षश्रेष्ठींनी या प्रक्रियेला वेग देत केंद्रीय निरीक्षकांची नियुक्ती केली आहे. उद्यापासून ही निरीक्षकांची टीम नागपूरमध्ये दाखल होणार असून, पुढील पाच दिवस शहरातील सर्व गट, पदाधिकारी आणि इच्छुकांशी सखोल चर्चा करून अंतिम अहवाल सादर करणार आहे.
या निरीक्षक पथकात अरुण यादव, माणिकराव ठाकरे, अशोक बोबडे आणि जिया पटेल यांचा समावेश आहे. ही टीम केवळ औपचारिक बैठकांपुरती मर्यादित न राहता, बंद दरवाजाआड गटनेत्यांशी स्वतंत्र चर्चा, कार्यकर्त्यांचे मत जाणून घेणे आणि संघटनात्मक ताकदीचा आढावा घेणार असल्याची माहिती पक्ष सूत्रांनी दिली आहे.
सध्याचे शहराध्यक्ष व आमदार विकास ठाकरे यांच्या उत्तराधिकाऱ्याची निवड काँग्रेससाठी मोठे आव्हान बनली आहे. कारण शहर काँग्रेसमध्ये सध्या तीन-चार प्रभावी गट सक्रिय असून, प्रत्येक गटाकडून अध्यक्षपदासाठी जोरदार लॉबिंग सुरू आहे. त्यामुळे ही निवड केवळ संघटनात्मक नसून, राजकीय ‘पॉवर बॅलन्स’ ठरवणारी ठरणार आहे.
माजी खासदार विलास मुत्तेमवार आणि विकास ठाकरे यांच्या गटाकडून विशाल मुत्तेमवार यांचे नाव आघाडीवर असल्याचे सांगितले जात आहे. या गटाची शहरातील संघटनात्मक पकड मजबूत मानली जाते.
दुसरीकडे, आमदार अभिजीत वंजारी आणि गिरीश पांडव यांनीही अध्यक्षपदासाठी आपली दावेदारी ठाम केली आहे. विशेषतः तरुण नेतृत्व आणि नव्या कार्यकर्त्यांचा पाठिंबा मिळवण्यावर त्यांचा भर असल्याचे दिसते.
माजी मंत्री नितीन राऊत यांच्या गटातून संजय दुबे आणि बंडोपंत टेंभुर्णे यांची नावे चर्चेत आहेत. राऊत गटाचे शहरातील विशिष्ट मतदारांवर असलेले वर्चस्व लक्षात घेता, या गटाची भूमिका निर्णायक ठरू शकते.
याशिवाय प्रदेश सचिव संदेश सिंगलकर, कमलेश समर्थ समर्थक गट आणि आरएम खान नायडू यांनीही आपापल्या पातळीवर हालचाली सुरू केल्या आहेत. या सर्व घडामोडींमुळे अध्यक्षपदाची निवड ‘वन-ऑन-वन’ लढतीऐवजी बहुकोनी स्पर्धेत रूपांतरित झाली आहे.
या संपूर्ण प्रक्रियेत एक वेगळीच रंगत आणणारी बाब म्हणजे निवृत्त अधिकारी अनिल शाहू यांनीही अध्यक्षपदासाठी दावा करत राजकारणात सक्रिय प्रवेश केला आहे. त्यामुळे पारंपरिक राजकीय चेहऱ्यांबरोबरच ‘नव्या पर्यायां’ची चर्चा सुरू झाली आहे.
दरम्यान, असंघटित कामगार काँग्रेसचे राष्ट्रीय समन्वयक राजेश निम्बाळकर यांनी या प्रक्रियेवर भाष्य करताना स्पष्ट केले की, “काँग्रेस ही केवळ राजकीय संघटना नसून जनआंदोलन आहे. त्यामुळे अध्यक्ष निवडताना गटबाजीला दुय्यम स्थान देत तळागाळातील कार्यकर्त्यांचा आवाज महत्त्वाचा ठरला पाहिजे.”
आता पुढील पाच दिवस नागपूर काँग्रेससाठी अत्यंत महत्त्वाचे ठरणार आहेत. निरीक्षकांची ‘मॅरेथॉन’ चर्चा, गटांमधील शक्तीप्रदर्शन आणि पडद्यामागील राजकीय हालचाली यावरून अंतिम निर्णय ठरणार आहे. हा निर्णय एकमताने होतो की वाद दिल्लीपर्यंत पोहोचतो, हे पाहणे महत्त्वाचे ठरणार आहे. नागपूर काँग्रेसचा पुढील चेहरा कोण असणार, याकडे आता संपूर्ण राजकीय वर्तुळाचे लक्ष लागले आहे.
