मुंबई : राज्याच्या राजकारणात पुन्हा एकदा मोठी खळबळ उडाली आहे. शिवसेना (UBT) खासदार संजय राऊत यांनी गुरुवारी पत्रकार परिषदेत धक्कादायक भाकीत करत, महायुती सरकारमध्ये सर्व काही सुरळीत नसल्याचा दावा केला. येत्या काळात महाराष्ट्रात मोठा राजकीय भूकंप होण्याची शक्यता त्यांनी व्यक्त केली.
राऊत यांच्या मते, सत्ताधारी आघाडीतील काही आमदार आपल्या राजकीय भवितव्याबाबत साशंक असून, सुरक्षित पर्यायाच्या शोधात आहेत. ही हालचाल केवळ सत्तेसाठी नसून अस्तित्व टिकवण्यासाठीची धडपड असल्याचे त्यांनी स्पष्ट केले.
५० आमदारांच्या पक्षांतराची चर्चा-
राऊत यांनी आकडेवारी देत दावा केला की, राष्ट्रवादी काँग्रेस पक्षातील २५ ते ३० आमदार आणि एकनाथ शिंदे गटातील सुमारे २५ आमदार भाजपमध्ये जाण्याच्या तयारीत आहेत. हे सर्व आमदार योग्य वेळेची वाट पाहत असून, परिस्थिती अनुकूल होताच मोठा निर्णय घेतला जाईल, असे त्यांनी सांगितले.
शिंदे गट आणि राष्ट्रवादीत फुटीची शक्यता-
येत्या काही दिवसांत सुनेत्रा पवार यांच्या गटात आणि शिंदे यांच्या शिवसेनेत मोठी फूट पडू शकते, असे भाकीतही राऊत यांनी वर्तवले. पक्षांतर्गत मतभेद आणि नेतृत्वावर वाढता अविश्वास ही परिस्थिती अधिक गंभीर बनवत असल्याचे त्यांनी नमूद केले.
निवडणूक आयोग आणि न्यायव्यवस्थेवर टीका-
शिवसेना नाव आणि चिन्ह प्रकरणातील सुनावणी पुढे ढकलल्याबद्दल राऊत यांनी सर्वोच्च न्यायालयावर नाराजी व्यक्त केली. तसेच निवडणूक आयोगाच्या कार्यपद्धतीवरही त्यांनी प्रश्नचिन्ह उपस्थित करत, ती पक्षपाती असल्याचा आरोप केला.
एकूणच, महायुतीतील अंतर्गत तणाव आणि संभाव्य पक्षांतरामुळे २०२६ मध्ये महाराष्ट्राच्या राजकारणात मोठे बदल होण्याची शक्यता व्यक्त होत आहे.
