धनगर आरक्षणावर घुमजाव करणाऱ्या पंकजा मुंडे यांचा घेतला समाचार.
मुंबई : धनगर समाजाला आरक्षण मिळत नाही तोपर्यंत मंत्रालयाची पायरी चढणार नाही म्हणणाऱ्या भाजप मंत्री पंकजा मुंडे यांनी आज घुमजाव केले आहे. त्यांना दोन दिवसपण सत्तेपासून दूर राहता येत नाही. यांचा हा खेळ सत्तेसाठी आहे असा आरोप राष्ट्रवादी काँग्रेसचे राष्ट्रीय प्रवक्ते नवाब मलिक यांनी केला.
महाराष्ट्राच्या मंत्री पंकजा मुंडे या दोन दिवसापूर्वी धनगर समाजाला आरक्षण मिळत नाही तोपर्यंत मंत्रालयाची पायरी चढणार नाही अशा सांगत होत्या आणि आता त्यांनी घुमजाव केले आहे. आज त्या मंत्रालयात आल्या त्यावेळी लोकांनी विचारले असता मी २०१९ला सत्ता मिळणार नाही असे म्हणाल्या असे स्पष्ट केले. म्हणजे याचा अर्थ या दोन दिवसपण सत्तेपासून हे दूर राहू शकत नाही. ही परिस्थिती आज आहे. यांचा हा खेळ सत्तेसाठीच आहे असेही नवाब मलिक म्हणाले.
राज्यात जेव्हा कधी निवडणूका होतील त्यावेळी लोकसभेत आणि विधानसभेत भाजपाला धनगर समाज धडा शिकवल्याशिवाय राहणार नाही असा विश्वासही नवाब मलिक यांनी व्यक्त केला.
