नागपूर : आगामी लोकसभा निवडणुकीत सर्व राजकीय पक्षांनी जोरदार तयारीला सुरुवात केली आहे. यापार्श्वभूमीवर नागपूर लोकसभा मतदारसंघाचे निरीक्षक खा. मनोज कोटक व माजी खासदार अमर साबळे हे नागपुरात आले होते. यावेळी त्यांनी शहरातील प्रमुख पदाधिकाऱ्यांची भूमिका जाणून घेतली. यादरम्यान सर्वच पदाधिकाऱ्यांनी नागपुरातून नितीन गडकरीच लोकसभेचे उमेदवार असल्याचे सांगितले आहे.
भाजपकडून जास्त जागा लढण्याची तयारी असल्याच्या चर्चा सुरू असताना मागील वेळी जिंकलेल्या २३ जागांसाठी पक्षाने निरीक्षक नियुक्त केले आहे. संबंधित मतदारसंघात जाऊन तेथील पदाधिकारी, इच्छुक उमेदवारांशी चर्चा करून आढावा घेण्याची जबाबदारी या निरीक्षकांवर देण्यात आली आहे. याच प्रक्रियेत कोटक व साबळे नागपुरात आले होते.
गुरुवारी दुपारी भाजप कार्यालयात शहरातील ७० प्रमुख पदाधिकाऱ्यांना बोलविण्यात आले होते. भाजयुमोच्या महासंमेलनासाठी व्यस्त असल्याने ५५ पदाधिकारी प्रत्यक्ष उपस्थित होते. सुरुवातीच्या नियोजनानुसार निरीक्षक प्रत्येकाकडून एक फॉर्म भरून घेणार होते व त्यात कुणाला उमेदवारी दिलेली जास्त संयुक्तिक ठरेल अशी विचारणा होणार होती. त्यानंतर प्रत्यक्ष संवाद साधण्याचे ठरविण्यात आले.
त्यानंतर शहराध्यक्ष बंटी कुकडे यांनी सर्वच पदाधिकाऱ्यांना नितीन गडकरी हेच उमेदवार म्हणून हवे असल्याचे सांगितले. दोन्ही निरीक्षकांनी शहरातील पक्ष संघटन, निवडणूकीची तयारी याबाबतदेखील धावता आढावा घेतला. ही भूमिका आता पक्षनेतृत्वाला कळविण्यात येणार असल्याची माहिती आहे.
या बैठकीला आमदार, माजी आमदार, माजी खासदार, विधानसभा क्षेत्रप्रमुख, निवडणूक प्रमुख, प्रदेश महामंत्री इत्यादी प्रमुख पदाधिकारी उपस्थित होते.
