नागपूर : भांडेवाडी परिसरात एक अत्यंत दुर्दैवी घटना घडली असून, १८ महिन्यांच्या चिमुकलीचा उघड्या गटाराच्या चेंबरमध्ये पडून मृत्यू झाला आहे. ही घटना सोमवारी सकाळी हनुमान नगर येथील प्लॉट नं. ३१/३२ येथे घडली.
प्राप्त माहितीनुसार, देवांशी शाम शहू (वय १८ महिने) ही चिमुकली सकाळी १०.३० वाजता घराजवळ खेळत असताना उघड्या गटाराच्या चेंबरमध्ये पडली. तिला बाहेर काढून तात्काळ भावानी रुग्णालय, पारडी येथे नेण्यात आले. मात्र उपचारादरम्यान रात्री १०.०५ वाजता डॉक्टरांनी तिचा मृत्यू झाल्याचे घोषित केले.
Gold Rate
15 july 2025
या घटनेबाबत चिमुकलीचा काका मनोज जमनाप्रसाद शहू (वय ४२) यांनी पारडी पोलीस ठाण्यात फिर्याद दिली असून, अपघाती मृत्यूची नोंद करण्यात आली आहे. पोलीस अधिक तपास करीत आहेत.
या घटनेमुळे परिसरातील नागरिकांमध्ये संतापाची लाट उसळली आहे. रहिवाशांनी नागपूर महापालिकेच्या दुर्लक्षित कारभारावर ताशेरे ओढले असून, नागरी भागात उघडी चेंबर्स ठेवल्यामुळे नागरिकांच्या जीवितास धोका निर्माण झाला असल्याचे त्यांनी सांगितले. प्रशासनाच्या हलगर्जीपणामुळे एका निष्पाप जीवाचा बळी गेल्याने संबंधितांवर कठोर कारवाई करण्यात यावी, अशी जोरदार मागणी आता होत आहे.
