नागपूर (हुडकेश्वर): नागपूरच्या हुडकेश्वर पोलीस ठाण्याच्या हद्दीत लाडीकर ले-आउटमध्ये एका महिला डॉक्टरच्या रहस्यमय हत्येमुळे संपूर्ण परिसरात खळबळ उडाली आहे. मृत महिला डॉक्टर अर्चना अनिल राहुले (वय ५०) या शासकीय वैद्यकीय महाविद्यालयाच्या फिजिओथेरपी विभागात सहाय्यक प्राध्यापक म्हणून कार्यरत होत्या. त्यांचा मृतदेह त्यांच्या राहत्या घरी रक्ताच्या थारोळ्यात सापडला असून, डोक्यावर जबर वार केल्याचे प्राथमिक तपासात उघड झाले आहे.
हत्या कशी उघडकीस आली?
प्राप्त माहितीनुसार, डॉ. अर्चना घरी एकट्याच राहत होत्या. त्यांचे पती डॉ. अनिल राहुले रायपूरमधील एका रुग्णालयात कार्यरत आहेत, तर मुलगा पुण्याला एमबीबीएसच्या तिसऱ्या वर्षाला शिकतो. शनिवारी रात्री सुमारे ९.३० वाजता डॉ. अनिल काही दिवसांनी नागपुरात आले. घरी आल्यावर दरवाजा उघडाच होता आणि आतून दुर्गंधी येत होती. त्यांनी घरात प्रवेश केल्यानंतर अर्चनाचा मृतदेह बेडरूममध्ये रक्ताने माखलेला अवस्थेत आढळून आला. त्यांनी आरडाओरडा केल्यावर शेजारी जमा झाले आणि पोलिसांना खबर देण्यात आली.
घटनास्थळी पोलिसांची तपासणी
हुडकेश्वर पोलीस ठाण्याचे ठाणेदार ज्ञानेश्वर भेदोड़कर आणि डीसीपी रश्मिता राव यांनी घटनास्थळी भेट दिली. प्राथमिक तपासात असे समोर आले की, डॉ. अर्चनाचा मृत्यू दोन ते तीन दिवसांपूर्वीच झाला होता. मृतदेह सडायला लागला होता आणि डोक्यावर लोखंडी वस्तूने वार केल्याचे स्पष्ट झाले.
तपासाची दिशा-
पोलिसांनी खुनाचा गुन्हा दाखल करून तपास सुरू केला आहे. मृतदेह पोस्टमार्टमसाठी शासकीय वैद्यकीय रुग्णालयात पाठवण्यात आला आहे. घरातून कोणती वस्तू चोरीस गेली आहे का, याची चौकशी सुरू आहे. लुटीच्या उद्देशाने हत्या झाली असावी, अशी शक्यता पोलिसांकडून वर्तवली जात आहे.
डॉ. अर्चनाच्या मोबाईलचे कॉल डिटेल्स तपासले जात आहेत आणि त्यांच्या संपर्कात आलेल्या लोकांची माहिती घेतली जात आहे. परिसरातील लोकांचीही चौकशी केली जात आहे, मात्र कोणालाही कोणतीही संशयास्पद हालचाल दिसली नसल्याचे सांगण्यात आले.या हत्येने परिसरात खळबळ उडवली आहे. पोलिसांकडून सर्व शक्य कोनातून तपास सुरू आहे आणि लवकरच आरोपींपर्यंत पोहोचण्याचा प्रयत्न केला जात आहे.
