नागपूर : शहरात दुचाकी चोरीच्या घटनांना आळा घालण्यासाठी सुरू असलेल्या कारवाईत क्राइम ब्रांचच्या युनिट-6 ने वाहन चोरट्यांच्या टोळीचा पर्दाफाश केला आहे. या प्रकरणात पोलिसांनी दोघांना अटक केली असून, त्यांच्या ताब्यातून चोरीच्या दुचाकींचे 11 इंजिन आणि एक पेट्रोल टाकी जप्त करण्यात आली आहे. टोळीतील आणखी एक आरोपी फरार असून, त्याचा शोध सुरू आहे.
कलमना पोलीस ठाण्यात दाखल असलेल्या वाहन चोरीच्या प्रकरणाचा तपास करत असताना क्राइम ब्रांच युनिट-6 च्या पथकाला आरोपी मयूर बोरकर हा कपिलनगर परिसरात फिरत असल्याची माहिती मिळाली. त्यानुसार पोलिसांनी 22 वर्षीय मयूरला ताब्यात घेऊन चौकशी केली. चौकशीत त्याने साथीदार ऋतिकसोबत मिळून शहरातील विविध भागांतून दुचाकी चोरी केल्याची माहिती दिल्याचे पोलिसांनी सांगितले.
चोरी केलेल्या दुचाकींचे पार्ट्स वेगळे करून ते पुढे विकले जात असल्याचे तपासात समोर आले. या माहितीच्या आधारे पोलिसांनी एका गॅरेजवर छापा टाकला. तेथून वेगवेगळ्या दुचाकींची 11 इंजिन आणि एक पेट्रोल टाकी जप्त करण्यात आली. या कारवाईत शांतिनगर येथील 38 वर्षीय आनंद अग्रवाल यालाही अटक करण्यात आली.
दोन्ही आरोपींना पुढील तपासासाठी कलमना पोलिसांच्या ताब्यात देण्यात आले आहे. टोळीने शहरातील आणखी कोणत्या भागांतून दुचाकी चोरी केल्या आणि चोरीच्या किती वाहनांचे पार्ट्स विकण्यात आले, याचा तपास सुरू आहे. दरम्यान, फरार आरोपी ऋतिक याचा शोध घेण्यात येत आहे.
