नागपूर — नागपूर महानगरपालिकेच्या सार्वत्रिक निवडणुकीचा अंतिम निकाल जाहीर झाला असून, भारतीय जनता पक्षाने (भाजप) शहराच्या राजकारणावर आपली पकड आणखी मजबूत केली आहे. एकूण १५१ जागांपैकी भाजपने तब्बल १०२ जागांवर विजय मिळवत स्पष्ट बहुमत प्राप्त केले आहे. या घवघवीत यशामुळे नागपूर महापालिकेवर भाजपचे निर्विवाद वर्चस्व सिद्ध झाले आहे.
विरोधकांना या निवडणुकीत अपेक्षित यश मिळाले नाही. काँग्रेस पक्ष दुसऱ्या क्रमांकावर राहिला असून त्यांना ३५ जागांवर समाधान मानावे लागले आहे. तर एआयएमआयएमने ६ जागांवर विजय मिळवत आपली उपस्थिती नोंदवली आहे.
Gold Rate
17 Jan 2026
शिवसेना (उद्धव ठाकरे गट) ला २ जागा, बसपा आणि राष्ट्रवादी काँग्रेस (अजित पवार गट) यांना प्रत्येकी १ जागा मिळाली आहे. याशिवाय इतर पक्ष व अपक्षांनी ४ जागा जिंकल्या आहेत.
भाजपला मिळालेल्या या प्रचंड यशामागे संघटनात्मक ताकद, प्रभावी प्रचार आणि विकासाच्या मुद्द्यांवर केंद्रित रणनीती कारणीभूत ठरल्याचे राजकीय विश्लेषकांचे मत आहे. या निकालानंतर नागपूर महापालिकेतील सत्तास्थापनेचा मार्ग भाजपसाठी पूर्णतः मोकळा झाला असून, शहराच्या कारभारावर पुढील पाच वर्षे भाजपचीच पकड राहणार हे स्पष्ट झाले आहे.
नागपूर मनपा निवडणूक २०२६ : पक्षनिहाय आकडेवारी
भाजपा – १०२
काँग्रेस – ३५
एआयएमआयएम – ६
शिवसेना (उद्धव ठाकरे गट) – २
बसपा – १
राष्ट्रवादी काँग्रेस (अजित पवार गट) – १
इतर – ४
नागपूरच्या राजकारणात या निकालाने नवे समीकरण निर्माण केले असून, आगामी काळात शहराच्या विकासदिशेकडे सर्वांचे लक्ष लागून राहिले आहे.
