नागपूर : नागपूर शहर गुन्हे शाखेने ७ ते ८ जुलैदरम्यान राबविलेल्या विशेष कोंबिंग ऑपरेशनमध्ये गुन्हेगारांविरोधात मोठी कारवाई करत खून, अमली पदार्थ तस्करी, जबरी चोरी आणि अल्पवयीन मुलीच्या शोधासह अनेक गंभीर प्रकरणांमध्ये महत्त्वाचे यश मिळविले. या कारवाईत एकूण आठ आरोपींना ताब्यात घेण्यात आले असून मोठ्या प्रमाणात मुद्देमाल जप्त करण्यात आला आहे.

गुन्हे शाखेच्या युनिट १, २, ३, ४, ५ तसेच घरफोडी विरोधी पथकाने शहरातील रेकॉर्डवरील आरोपी, तडीपार गुन्हेगार, एमपीडीए अंतर्गत कारवाई झालेल्या आरोपी आणि गंभीर गुन्ह्यांतील संशयितांची घरोघरी जाऊन पडताळणी केली. या मोहिमेदरम्यान अनेक आरोपींची अद्ययावत माहिती, छायाचित्रे आणि सद्यस्थितीची नोंद करण्यात आली, तर फरार आरोपींचा शोध सुरू आहे.

Gold Rate

July 08 ,2026 - Time 10.30Hrs

Gold 24 KT ₹ 1 44,200 /-

Gold 22 KT ₹ 1,33,800 /-

Silver/Kg ₹ 2,26,200/-

Platinum ₹ 88,000/-

Recommended rate for Nagpur sarafa Making charges minimum 13% and above

भांडेवाडी येथील खून प्रकरणात गुन्हे शाखेच्या युनिट ५ ने दोन विधीसंघर्षग्रस्त बालकांना ताब्यात घेतले. चौकशीदरम्यान खुनामागील कट, मुख्य सूत्रधार आणि सुपारीसाठी पैशांची देवाणघेवाण झाल्याची धक्कादायक माहिती समोर आली. या प्रकरणाचा पुढील तपास भांडेवाडी पोलीस करत आहेत.

धंतोली पोलीस ठाण्यातील प्रकरणात मानव तस्करी प्रतिबंधक पथकाने अल्पवयीन मुलीचा सुरक्षित शोध घेतला. संबंधित आरोपीला न्यायालयीन कोठडी सुनावण्यात आली असून मुलीचे समुपदेशन करून तिला पुढील कार्यवाहीसाठी पोलिसांच्या ताब्यात देण्यात आले.

कळमना पोलीस आणि गुन्हे शाखा युनिट ५ यांच्या संयुक्त कारवाईत १०.४३२ ग्रॅम गांजा, एक टाटा ट्रक, एक अॅक्टिवा, तीन मोबाईल फोन आणि रोख रक्कम जप्त करण्यात आली. या प्रकरणी तीन आरोपींविरुद्ध अमली पदार्थविरोधी कायद्यान्वये गुन्हा दाखल करण्यात आला आहे.

दरम्यान, लकडगंज पोलीस ठाण्यातील जबरी चोरी आणि मारहाणीनंतर व्यक्तीला ऑटोतून फेकून दिल्याच्या प्रकरणात गुन्हे शाखेच्या युनिट ३ ने सीसीटीव्ही फुटेजच्या आधारे समांतर तपास करत तीन आरोपींना ताब्यात घेतले. त्यांना पुढील कारवाईसाठी लकडगंज पोलिसांच्या स्वाधीन करण्यात आले.

या विशेष मोहिमेत गुन्हे शाखेने शहरातील गुन्हेगारांवर प्रभावी कारवाई करत गंभीर गुन्ह्यांचा छडा लावला असून कायदा-सुव्यवस्था अधिक मजबूत करण्याच्या दिशेने महत्त्वाचे पाऊल उचलले आहे.