Published On : Fri, Nov 20th, 2026
By Nagpur Today Nagpur News

नागपुरात 20 ते 25 CCTV कॅमेऱ्यांच्या फुटेजमधून वाहन चोराचा पर्दाफाश; दोन चोरीच्या दुचाकी जप्त!

Advertisement

नागपुरात 20 ते 25 CCTV कॅमेऱ्यांच्या फुटेजमधून वाहन चोराचा पर्दाफाश; दोन चोरीच्या दुचाकी जप्त!

नागपूर : नागपुरात वाहन चोरीच्या घटनांना आळा घालण्यासाठी पोलिसांकडून सुरू असलेल्या कारवाईदरम्यान कलमना पोलिसांना दुचाकी चोरीच्या दोन घटनांचा उलगडा करण्यात यश आले आहे. एका मोटरसायकल चोरीच्या तपासासाठी परिसरातील 20 ते 25 सीसीटीव्ही कॅमेऱ्यांची फुटेज तपासण्यात आली. या फुटेजच्या आधारे पोलिसांनी 22 वर्षीय आरोपीला ताब्यात घेतले. चौकशीदरम्यान आरोपीकडून दोन चोरीच्या मोटरसायकली जप्त करण्यात आल्या असून, जप्त वाहनांची एकूण किंमत अंदाजे 45 हजार रुपये असल्याचे सांगण्यात येत आहे.

ही घटना कलमना पोलीस ठाण्याच्या हद्दीतील आजरी मांजरी परिसरात घडली. परिसरातील एका नागरिकाने आपली मोटरसायकल घराबाहेर उभी केली होती. 16 नोव्हेंबरच्या रात्री 11 वाजेपासून 17 नोव्हेंबरच्या सकाळी 9 वाजेपर्यंतच्या कालावधीत अज्ञात चोरट्याने संधी साधून घराबाहेर उभी असलेली मोटरसायकल चोरी केली. वाहन चोरी झाल्याचे लक्षात आल्यानंतर संबंधित नागरिकाने कलमना पोलीस ठाण्यात तक्रार दाखल केली. तक्रारीच्या आधारे पोलिसांनी गुन्हा नोंदवून चोरट्याचा शोध सुरू केला.

चोरीच्या वाहनाचा माग काढण्यासाठी कलमना पोलिसांनी घटनास्थळ आणि आसपासच्या परिसरातील सीसीटीव्ही कॅमेऱ्यांची तपासणी केली. जवळपास 20 ते 25 कॅमेऱ्यांच्या फुटेजचे विश्लेषण करून पोलिसांनी चोरट्याच्या हालचालींचा मागोवा घेतला. तपासातून मिळालेल्या माहितीच्या आधारे पोलिसांनी पर्वती नगर, कलमना गाव परिसरातील 22 वर्षीय शोएब खान तज्जमुल खान याला ताब्यात घेतले.

पोलिसांनी आरोपीची चौकशी केली असता, त्याने संबंधित मोटरसायकल चोरीच्या प्रकरणात सहभाग असल्याची माहिती समोर आली. त्याच्याकडून चोरीची मोटरसायकल जप्त करण्यात आली. मात्र, तपासादरम्यान पोलिसांना आणखी एका वाहन चोरीच्या गुन्ह्याचा धागा मिळाला. आरोपीकडून लाल रंगाची दुसरी मोटरसायकलही जप्त करण्यात आली. ही मोटरसायकल कलमना पोलीस ठाण्यात दाखल असलेल्या दुसऱ्या वाहन चोरीच्या प्रकरणातील असल्याचे तपासात समोर आले.

Advertisement

त्यामुळे एका मोटरसायकल चोरीच्या तपासातून पोलिसांनी दोन वाहन चोरीच्या घटनांचा उलगडा केला. या कारवाईत दोन्ही मोटरसायकली जप्त करण्यात आल्या असून, त्यांची एकूण किंमत 45 हजार रुपये असल्याचे सांगण्यात येत आहे. आरोपीला ताब्यात घेऊन कलमना पोलीस पुढील तपास करीत आहेत.

या कारवाईबाबत कलमना पोलीस ठाण्याचे प्रवीण काळे यांनी अधिक माहिती दिली.

Advertisement
GET YOUR OWN WEBSITE
FOR ₹9,999
Domain & Hosting FREE for 1 Year
No Hidden Charges
Follow Nagpur Today on Google
Add Nagpur Today to your Preferred Sources on Google to see our latest news more prominently in Search.