नागपूर : एप्रिल महिन्याच्या सुरुवातीपासूनच शहराचे तापमान वाढायला सुरुवात होते. त्यामुळे शाळा दिवसभर सुरु ठेवणे शक्य नाही. शासनाच्या निर्देशानुसार विद्यार्थ्यांच्या सुरक्षेच्या दृष्टीने शुक्रवार १ एप्रिल २०२२ पासून नागपूर महानगरपालिका क्षेत्रातील सर्व शाळातील इयत्ता १ ली ते ९ वी व इयत्ता ११ वी चे वर्ग सकाळी ७ ते दुपारी १२ पर्यंत सुरु ठेवण्याचे आदेश मनपा आयुक्त राधाकृष्णन बी. यांनी बुधवारी (ता. ३०) जारी केले.

शहरातील कोरोनाचा प्रादुर्भाव दिवसेंदिवस कमी होत असून सर्व आस्थापना/ कार्यक्रमावरील कोरोना विषयक निर्बंध टप्या-टप्याने उठविण्यात येत आहेत. कोरोनाच्या प्रादुर्भावामुळे विद्यार्थ्यांचे झालेले शैक्षणिक नुकसान भरून काढण्यासाठी सदर आदेश देण्यात आलेले आहेत. रविवारी ऐच्छिक स्वरूपात शाळा सुरु ठेवता येईल. इयत्ता १ ली ते ९ वी व इयत्ता ११ वी च्या वर्गातील विद्यार्थ्यांच्या परीक्षा माहे एप्रिल महिन्यातील तिसऱ्या आठवड्यात घेण्यात याव्यात व निकाल मे महिन्यात जाहीर करण्यात यावा, सकाळच्या सत्रात शाळा घेण्यात येत असल्याने अध्यापनाच्या तासिका पूर्णवेळ शाळेप्रमाणे घेण्यात याव्यात तसेच दररोज १०० टक्के विद्यार्थ्यांची उपस्थिती आवश्यक असल्याचे आदेशात म्हटले आहे.