आकाशवाणी चौक, मोरभवन येथे प्रवाशांनी सांगितल्या अडचणी
नागपूर : शहरातील नागरिकांना उत्तम परिवहन सेवा मिळावी यासाठी मनपातर्फे ‘आपली बस’सेवा प्रदान करण्यात येत आहे. मात्र ‘आपली बस’ने प्रवास करताना अनेक अडचणींचा सामना करावा लागत असल्याच्या तक्रारी नागरिकांकडून मांडल्या जातात. नागरिकांच्या तक्रारी आणि ‘आपली बस’मधील व्यवस्था या सर्वांबाबत आढावा घेण्यासाठी सोमवारी (ता.९) महापौर संदीप जोशी व परिवहन समिती सभापती जितेंद्र (बंटी) कुकडे यांनी ‘आपली बस’च्या प्रवाशांनी संवाद साधला. यावेळी महापौर व परिवहन समिती सभापतींनी आकाशवाणी चौक ते संविधान चौक पर्यंत ‘आपली बस’ने प्रवास करीत नागरिकांच्या समस्या जाणून घेतल्या.
याप्रसंगी उपायुक्त तथा परिवहन व्यवस्थापक राजेश मोहिते, प्रशासकीय अधिकारी रवींद्र पागे, कार्यकारी अभियंता केदार मिश्रा, यांत्रिकी अभियंता योगेश लुंगे, ट्रॅव्हल टाईम बस सर्व्हीसेसचे सदानंद काळकर, आर.के.सिटी बस सर्व्हीसेसचे नीलमणी गुप्ता, हंसा सिटी बस सर्व्हीसेसचे श्री.पारेख, डिम्स बस सर्व्हीसेसचे सुर्यकांत अंबाडीकर, सुनील शुक्ला, गिरीश महाजन, प्रभव बोकारे आदी उपस्थित होते.
प्रारंभी महापौर संदीप जोशी व परिवहन समिती सभापती जितेंद्र (बंटी) कुकडे यांनी आकाशवाणी चौकातील प्रवाशांनी संवाद साधला. यावेळी विविध मार्गावर जाणा-या बस मधील प्रवाशांशीही संवाद साधत त्यांच्या अडचणी जाणून घेतल्या. अनेकदा वाहकांकडून तिकीट दिले जात नाही, स्थानकावर बस थांबत नाही अशा अनेक समस्या प्रवाशांनी मांडल्या. यानंतर महापौर व परिवहन समिती सभापतींनी आकाशवाणी चौक ते संविधान चौक पर्यंत ‘आपली बस’ने प्रवास केला. यावेळी बसमधील महिला, ज्येष्ठ नागरिक तसेच विद्यार्थ्यांशी संवाद साधत त्यांनी समस्या जाणून घेतल्या. संविधान चौकातील बस स्थानकावर प्रवाशी विद्यार्थ्यांशी संवाद साधताना बर्डी-शांतीनगर-कामठी मार्गावरील बसमधील ज्येष्ठ नागरिक प्रवाशांना पूर्ण तिकीट दिल्याची तक्रार बसमधील प्रवाशांनी केली. याबाबत संबंधित बस वाहकावर कारवाईचे निर्देश महापौर संदीप जोशी यांनी दिले.
प्रवाशांशी सौजन्याने वागा
मनपाच्या ‘आपली बस’ने प्रवास करणा-या प्रवाशांना बसचे चालक, वाहक योग्य वागणूक देत नसल्याची अनेक नागरिकांची तक्रार आहे. त्यामुळे बसमध्ये बसणा-या प्रत्येक प्रवाशासोबत सौजन्याने वागा, असा सल्ला महापौर संदीप जोशी यांनी मोरभवन बस स्थानक येथील चालक व वाहकांना दिला. यावेळी विद्यार्थी तसेच नागरिकांनी अनेक समस्या मांडल्या. मोरभवन बस स्थानक परिसरातील रस्त्याची स्थिती वाईट आहे. यावर महापौरांनी गांभीर्य दर्शवित तातडीने याबाबत प्रस्ताव तयार करून रस्त्याचे काम सुरू करण्याचे निर्देश दिले.
‘आपली बस’च्या चालक व वाहकांनीही यावेळी आपल्या अनेक तक्रारी व समस्या महापौर व परिवहन समिती सभापतींपुढे मांडल्या. ‘आपली बस’च्या माध्यमातून शहरवासीयांना उत्तम परिवहन सेवा पुरविण्यामध्ये बसच्या चालक व वाहकांची महत्वाची भूमिका आहे. त्यामुळे सर्व चालक आणि वाहकांच्या समस्या आणि मनपाकडे येणा-या तक्रारी याबद्दल चर्चा करण्यासाठी लवकरच चालक व वाहकांशी संवाद साधणार असल्याचे यावेळी महापौर संदीप जोशी यांनी सांगितले.
