अहमदनगर: मराठा आरक्षणासाठी राज्यभर आंदोलने सुरू असताना भाजपमधील मराठा आमदार शिवाजी कर्डिले यांनी राजकीय शक्तिप्रदर्शनासाठी दिलेल्या आखाड पार्टीवरून टीका सुरू झाली आहे. या कार्यक्रमास काँग्रेस व राष्ट्रवादी काँग्रेसचे नेतेही मोठ्या संख्येने उपस्थित होते. मात्र, संयोजक म्हणून कर्डिलेंना सोशल मीडियात ट्रोल केले जात आहे.
बाजार समिती निवडणुकीत स्वीकृत संचालक म्हणून निवड झालेल्यांचा सत्कार समारंभ नुकताच नगरजवळील एका लॉन्समध्ये झाला. या कार्यक्रमाचे नियोजन कर्डिले यांनी केले होते. यासाठी मोठी गर्दीही जमविण्यात आली होती. सर्वपक्षीय प्रमुख नेते यावेळी उपस्थित होते. या मेळाव्यानंतर आखाड पार्टी झाली.
Gold Rate
22 Jan 2026
यावरून सोशल मीडियात टीका सुरू झाली आहे. मराठा आरक्षणासंबंधी मराठा आमदारांनी भूमिका घ्यावी, अशी मागणी मराठा समाजातून होत आहे. आरक्षणाच्या मागणीसाठी रविवारी राज्यात आणि नगर जिल्ह्यातही काही ठिकाणी आंदोलने सुरू असताना कर्डिलेंचे राजकीय शक्तिप्रदर्शन आणि आखाड पार्टी यामुळेच लक्ष्य करण्यात येत आहे. ग्रामविकास मंत्री पंकजा मुंडे यांनी आंदोलानांच्या पार्श्वभूमीवर आपला वाढदिवस साजरा न केल्याचे उदाहरणही टीकाकारांनी टीका करताना पुढे केले आहे. सोशल मीडियात याची जोरदार चर्चा सुरू आहे. कर्डिले समर्थकांकडून अद्याप याला उत्तर देण्यात आल्याचे दिसत नाही.
