केरळ– केरळ राज्यासाठी अभिमानाचा क्षण ठरावा अशी घडामोड घडत आहे. २४ वर्षीय थन्या नाथन सी. या पूर्णतः दृष्टिहीन तरुणीने न्यायिक सेवेतील सर्वोच्च टप्पा गाठत न्यायाधीशपद मिळवले आहे. त्यामुळे त्या केरळमधील पहिल्या पूर्णतः दृष्टिहीन महिला न्यायाधीश म्हणून ओळखल्या जाणार आहेत.
दृष्टीचा अभाव असूनही थन्या यांनी शिक्षणातील प्रत्येक अडथळा धैर्याने पार केला. ब्रेल लिपीतील अभ्याससामग्री, स्क्रीन रिडर आणि ऑडिओ तंत्रज्ञान यांच्या सहाय्याने त्यांनी कन्नूर विद्यापीठातून कायद्याची पदवी यशस्वीरीत्या पूर्ण केली.
पदवी प्राप्तीनंतर त्यांनी तलिपारंबा येथे ज्येष्ठ वकील के. जी. सुनीलकुमार यांच्या मार्गदर्शनाखाली प्रशिक्षणार्थी वकील म्हणून काम करत न्यायालयीन कामकाजाचा सखोल अनुभव मिळवला. पुढे त्यांनी केरळ न्यायिक सेवा परीक्षा दिली आणि उत्कृष्ट कामगिरी करत पहिला क्रमांक पटकावला.
लवकरच त्या न्यायालयात न्यायाधीश म्हणून कार्यभार स्वीकारणार आहेत. थन्या नाथन यांचा संघर्ष, चिकाटी आणि आत्मविश्वास यांचा प्रवास समाजातील तरुणांसाठी प्रेरणादायी ठरत असून, अशक्य काहीच नसते हे त्यांनी आपल्या यशातून सिद्ध केले आहे.
