| | Contact: 8407908145 |
    Published On : Wed, May 3rd, 2017

    सरकारने 7/12 दुरुस्ती आणि चावडी वाचन विशेष मोहीम केली सुरु

    sat-bara
    मुंबई:
    7/12 उतारा हा प्रत्येक शेतकऱ्याच्या दृष्टीकोनातून महत्वाचा विषय. या सात बाराच्या उताराबाबत सगळी माहिती मिळणं आवश्यक असते. याचसाठी मुख्यमंत्री देवेंद्र फडणवीस यांनी महाराष्ट्र दिनाच्या निमित्ताने महत्त्वाचा कार्यक्रम हाती घेतला आहे. सरकारने 7/12 दुरुस्ती आणि चावडी वाचन विशेष मोहीम सुरु केली आहे. यानुसार तुमचा ऑनलाईन सात-बारा उतारा योग्य आहे का हे तपासून पाहा. आणि काही फेरबदल असेल तर तो तातडीने करून घ्या.

    तुम्ही तुमचा सात/बारा https://mahabhulekh.maharashtra.gov.in/ या वेबसाईटवर पाहू शकाल.

    असा असेल या मोहिमेचा दिनक्रम
    जर तुमच्या उताऱ्यात काही त्रुटी असतील तर 1 मे 2017 ते 15 मे 2017 पर्यंत गावातील तलाठ्याशी संपर्क साधा.

    15 मे ते 15 जून 2017
    यानंतर 15 मे 2017 ते 15 जून 2017 पर्यंत संगणीकृत 7/12 चे चावडी वाचन होईल. यामध्येही काही आक्षेप असल्यास, गाव तलाठीशी संपर्क साधा.

    16 जून ते 31 जुलै 2017
    संगणकीकृत 7/12 मधील माहितीत प्राप्त आक्षेपांचा विचार करुन आवश्यक त्या दुरुस्त्या करण्यात येतील.

    1 ऑगस्ट 2017
    1 ऑगस्टपासून तुम्हाला डिजीटल स्वाक्षरीत 7/12 उपलब्ध होतील. त्यासाठी तुम्हाला चावडीत/ग्राम पंचायतमध्ये किंवा तलाठी कार्यालयात जाण्याची गरज नसेल.

    सध्या काही जिल्ह्यात ऑनलाईन सातबारा दिला जात नाही. दफ्तरातील सातबारा आणि संगणकावरील सातबारा यामध्ये थोडी तफावत असल्याने 7/12 नाहीत. त्यामुळेच सार्वत्रिक ऑनलाईन सात-बारा सध्या उपलब्ध करुन देण्यात आलेला नाही. ही त्रुटी दूर करण्यासाठीच एडिट मोडूल म्हणजेच सात-बारा दुरुस्तीचे सॉफ्टवेअर उपलब्ध करून देण्यात आले आहे.

    सध्या सर्व तलाठी आणि मंडळ अधिकारी ऑनलाईन पद्धतीने याच कामात गेल्या नऊ महिन्यांपासून व्यस्त आहेत. आता सर्वच जिल्ह्याची एडिटची सरासरी टक्केवारी 80 % झाली आहे. 20% राहिलेले काम झाले की सर्व सातबारे ऑनलाईन उपलब्ध होतील. यासाठी तलाठी कार्यालयात जाण्याची आवश्यकता असणार नाही. ऑनलाईन पैसे देऊन किंवा महा ई सेवा केंद्रातून डिजीटल सहीचा वैध कायदेशीर सात – बारा मिळेल.

    सर्व नागरिक आणि शेतकरी यांना आवाहन करण्यात येत आहे की मोबाईलवर,महा ई सेवा केंद्र, सायबर कॅफे या ठिकाणी महाभूलेख या वेबसाईटवर आपण आपला सातबारा तपासावा. काही त्रुटी असतील तर तातडीने तलाठ्याच्या निदर्शनास आणून द्या, म्हणजे तो सातबारा दुरुस्त करता येईल.

    Stay Updated : Download Our App
    Mo. 8407908145