नागपूर : खापरखेडा पोलीस ठाण्याच्या हद्दीतील बाबुळखेडा, चिचोली ग्रामपंचायत परिसरात दारूच्या व्यसनावरून झालेल्या कौटुंबिक वादातून वडिलांचा मृत्यू झाल्याची घटना समोर आली आहे. धर्मेंद्र कापसे (वय ५१) असे मृत व्यक्तीचे नाव असून, ते माजी सरपंच होते. या प्रकरणी त्यांचा मुलगा अंकित कापसे (वय ३०) याला गुन्हे शाखेच्या पथकाने ताब्यात घेतले आहे.
प्राथमिक माहितीनुसार, अंकितला दारूचे व्यसन असल्याने त्यावरून त्याचे आई-वडिलांशी वारंवार वाद होत होते. गुरुवारी सकाळी धर्मेंद्र कापसे हे शेजारी निंबकर यांच्या घरी बसले असताना अंकित तेथे आला. यावेळी दारूच्या व्यसनावरून दोघांमध्ये वाद झाला. त्यानंतर हाणामारी झाल्याचे सांगितले जाते.
आरोपानुसार, अंकित घरी जाऊन लोखंडी टॉमी घेऊन परत आला आणि त्याने वडिलांवर हल्ला केला. या हल्ल्यात गंभीर दुखापत झाल्याने धर्मेंद्र कापसे यांचा मृत्यू झाला. घटनेनंतर अंकित घटनास्थळावरून फरार झाला.
घटनेची माहिती मिळताच खापरखेडा पोलिसांनी तपास सुरू केला. मोबाईल लोकेशनच्या आधारे गुन्हे शाखेच्या युनिट ६ आणि युनिट ३ च्या पथकांनी कारवाई करून अंकितला ताब्यात घेतले. डीसीपी रमेश धुमाळ यांनीही घटनास्थळाची पाहणी केली. प्राथमिक तपासात कौटुंबिक वादातून ही घटना घडल्याचे समोर आले असून, पुढील तपास खापरखेडा पोलीस करीत आहेत.
