मनपामध्ये प्रतिनिधींची बैठक : शहरातील तलाव विसर्जनासाठी पूर्णतः बंद
नागपूर : पर्यावरणपूरक गणेशोत्सवाच्या अनुषंगाने नागपूर महानगरपालिकेने स्वयंसेवी संस्थांच्या सहकार्यासाठी मनपा सभागृहात बैठक घेतली. या बैठकीच्या अध्यक्षस्थानी अतिरिक्त आयुक्त श्री. राम जोशी होते. यावेळी घनकचरा व्यवस्थापन विभागाचे उपायुक्त व संचालक डॉ. गजेंद्र महल्ले उपस्थित होते.
नागपूर शहरात 4 फुटांपर्यंतच्या गणेशमूर्तींचे विसर्जन करण्यासाठी एकूण 350 कृत्रिम तलाव तयार करण्यात येणार असल्याचे डॉ. गजेंद्र महल्ले यांनी बैठकीत सांगितले. पर्यावरणपूरक गणेश विसर्जन आणि निर्माल्य संकलनासाठी मनपाला मदत करण्यासाठी विविध स्वयंसेवी संस्थांनी विविध विसर्जनस्थळी उपस्थित राहण्याचे मान्य केले. दरवर्षीप्रमाणे यंदाही ग्रीन व्हिजिल फाऊंडेशन फुटाळा तलाव येथील एअरफोर्स बाजूने उपस्थित राहणार आहे. तसेच सक्करदरा तलावातील किंग कोब्रा ऑर्गनायझेशन, रामनगरमधील इको-फ्रेंडली फाऊंडेशन, सोनेगाव येथील सीएसएफडी, एम्प्रेस मिल येथील तेजस्विनी महिला मंडळ, सोनेगाव तलावातील ग्रीन अर्थ ऑर्गनायझेशन आणि गांधीसागर तलावातील निसर्ग विज्ञान आदी संस्था उपस्थित राहणार आहेत.
बैठकीत सर्व 10 झोनच्या झोनल अधिकाऱ्यांनी आपापल्या झोनमध्ये कृत्रिम तलाव निर्माण करण्याबाबत माहिती दिली. मनपाचे अतिरिक्त आयुक्त श्री. राम जोशी यांनी पर्यावरणपूरक गणेश विसर्जनासाठी सर्व स्वयंसेवी संस्थांनी पुढे येऊन मनपाला सर्व सहकार्य करण्याचे आवाहन केले.
बैठकीला कौस्तभ चटर्जी, सुरभी जैस्वाल, अरविंद कुमार रातोडी, अनुसया छबरणी, विजय घुगे, विजय लिमये, मेहुल कोसुरकर, किरण मुंद्रा, अतुल पिंपळेकर आदी विविध स्वयंसेवी संस्थांचे प्रतिनिधी उपस्थित होते.
