नाशिक : राज्यभरात खळबळ उडवणाऱ्या अशोक खरात प्रकरणात आता तपासाचा फास आणखी घट्ट होताना दिसत आहे. मुख्यमंत्री देवेंद्र फडणवीस यांनी या प्रकरणात मोठं वक्तव्य करत खरातच्या सर्व संशयास्पद आर्थिक व्यवहारांची चौकशी आता प्रवर्तन संचालनालय (ED)मार्फत केली जाणार असल्याचे स्पष्ट केले. या प्रकरणात सरकार कोणतीही ढिलाई सहन करणार नसल्याचा इशाराही त्यांनी दिला.
फडणवीस म्हणाले की, अशोक खरात याने केलेल्या सर्व आर्थिक व्यवहारांची माहिती ED कडून तपासली जाणार आहे. प्राथमिक माहिती ED ने गोळा केली असून पुढील कारवाईला सुरुवात झाली आहे. खरातच्या बेनामी मालमत्ता आणि जमिनींचा तपशील समोर आल्यानंतर कायद्यानुसार कठोर पावले उचलली जातील, असेही त्यांनी स्पष्ट केले.
दरम्यान, गंभीर आरोपांना सामोरे जाणारा अशोक खरात सध्या SIT च्या ताब्यात असून त्याच्याविरोधात आतापर्यंत १२ गुन्हे नोंदवले गेले आहेत. SIT कडून तपास जलद गतीने सुरू असून दररोज नवे धागेदोरे समोर येत आहेत. तपासाच्या गोपनीयतेमुळे सर्व माहिती सध्या उघड करता येत नसली तरी योग्य वेळी संपूर्ण प्रकरणाचा खुलासा केला जाईल, असे फडणवीस यांनी सांगितले.
या प्रकरणात कॉल डिटेल रेकॉर्ड (CDR) लीक झाल्याबाबतही सरकारने गंभीर दखल घेतली आहे. CDR ही माहिती केवळ तपास यंत्रणांसाठी मर्यादित असताना ती बाहेर कशी आली, याचा शोध घेतला जाणार आहे. दोषींवर कठोर कारवाई केली जाईल, असा इशाराही देण्यात आला.
विरोधकांकडून होत असलेल्या आरोपांवर प्रत्युत्तर देताना फडणवीस यांनी सांगितले की, काहीजण या संवेदनशील प्रकरणाचे राजकारण करण्याचा प्रयत्न करत आहेत. मात्र, सरकार आणि SIT पारदर्शकपणे काम करत असून कोणालाही सोडले जाणार नाही. दोषींवर कायद्याचा कठोर बडगा उगारला जाईल, असा ठाम संदेश त्यांनी दिला.
