कन्हान : – येथील विकास प्राथमिक शाळेत आज (दि.२६) विदर्भ प्राथमिक शिक्षक संघ व लाईव्ह अर्थ सेवा संरक्षण ट्रस्टच्या वतीने गरजवंत विद्यार्थ्यांना पाठ्यसामुग्रीचे मोफत वाटप करण्यात आले.
कार्यक्रमाच्या अध्यक्षस्थानी तहसीलदार वरुण सहारे तर प्रमुख पाहुणे म्हणून विदर्भ प्राथमिक शिक्षक संघाचे सचिव खिमेश बढिये, मुख्याध्यापक राजेंद्र खंडाईत, तालुका संघटक भीमराव शिंदेमेश्राम उपस्थित होते. गरजू विद्यार्थ्यांना शिक्षणात मदत करुन त्यांना खंबीरपणे उभे राहण्याचे पाठबळ या सामाजिक उपक्रमातून होत असल्याचे गौरवोद्गार तहसीलदार सहारे यांनी व्यक्त केले.
यावेळी १६ प्राथमिक शाळेच्या विद्यार्थ्यांना पाठ्यसामुग्रीचे वितरण करण्यात आले. कार्यक्रमाचे संचालन शशिकांत बोंदरे यांनी तर आभार देवेंद्र सेंगर यांनी मानले. कार्यक्रमाच्या आयोजनासाठी विजय तिमांडे, श्रीरंग बोरकर, शरद डोकरीमारे, श्रीमती सुनंदा बारई यांनी सहकार्य केले.
