नागपूर : शहरातील अमली पदार्थांच्या तस्करीविरोधात गुन्हे शाखेने कारवाईचा धडाका कायम ठेवला आहे. गुन्हे शाखेच्या युनिट क्रमांक ५ ने कोराडी परिसरात कारवाई करत २६ वर्षीय तरुणाला अटक केली. त्याच्याकडून १४.१५ ग्रॅम एमडी, रोख रक्कम, इलेक्ट्रॉनिक वजनकाटा, दुचाकी आणि मोबाईल असा एकूण २ लाख ५९ हजार १७० रुपयांचा मुद्देमाल जप्त करण्यात आला.
१८ ऑगस्ट रोजी दुपारी १ ते ३ वाजण्याच्या सुमारास आर्यनगरातील जगदंबा रेसिडेन्सीच्या वाहनतळ परिसरात ही कारवाई करण्यात आली. गुप्त माहितीच्या आधारे पोलिसांनी सापळा रचून फरहान आयुब शेख याला ताब्यात घेतले. तो जगदंबा रेसिडेन्सीतील सदनिका क्रमांक १०१ मध्ये भाड्याने राहत होता.
Gold Rate
Sept 07 ,2026 - Time 10.30Hrs
तपासणीदरम्यान त्याच्याकडे १४.१५ ग्रॅम एमडी आढळून आले. या अमली पदार्थाची अंदाजे किंमत १ लाख ४१ हजार ५०० रुपये आहे. याशिवाय ५ हजार ६७० रुपये रोख, सुमारे २ हजार रुपयांचा इलेक्ट्रॉनिक वजनकाटा, ९० हजार रुपये किमतीची दुचाकी आणि सुमारे २० हजार रुपयांचा मोबाईल पोलिसांनी जप्त केला.
या प्रकरणाच्या तपासात शाहिद अन्सारी याचे नाव समोर आले असून तो मोमिनपुऱ्यातील टाकिया दिवानशाह परिसरातील रहिवासी असल्याचे पोलिसांनी सांगितले. तो सध्या फरार असून त्याचा शोध सुरू आहे.
फरहान शेखविरुद्ध अमली पदार्थ प्रतिबंधक कायद्याच्या कलम ८(क), २२(ब) आणि २९ अन्वये गुन्हा दाखल करण्यात आला आहे. जप्त केलेला मुद्देमाल आणि आरोपीला पुढील कारवाईसाठी कोराडी पोलिसांच्या ताब्यात देण्यात आले आहे.
एमडीचा पुरवठा नेमका कुठून झाला, त्याची विक्री कोणाला केली जाणार होती आणि या व्यवहारामागे आणखी कोणाचा सहभाग आहे, याचा तपास पोलिसांकडून सुरू आहे. फरार शाहिद अन्सारीच्या अटकेनंतर या अमली पदार्थांच्या साखळीबाबत आणखी माहिती समोर येण्याची शक्यता आहे.
पोलीस निरीक्षक विनायक गोल्हे यांच्या मार्गदर्शनाखाली गुन्हे शाखेच्या युनिट क्रमांक ५ ने ही कारवाई केली.
