सुलतानपूर : काँग्रेस नेते आणि लोकसभेतील विरोधी पक्षनेते राहुल गांधी यांना मानहानीच्या प्रकरणात मोठा दिलासा मिळाला आहे. भाजपचे तत्कालीन राष्ट्रीय अध्यक्ष आणि सध्याचे केंद्रीय गृहमंत्री अमित शाह यांच्याबाबत २०१८ मध्ये कथित आक्षेपार्ह टिप्पणी केल्याप्रकरणी सुलतानपूर येथील विशेष खासदार-आमदार न्यायालयाने राहुल गांधी यांना दोषमुक्त केले आहे.
कर्नाटक विधानसभा निवडणुकीच्या प्रचारादरम्यान ८ मे २०१८ रोजी बंगळुरू येथे राहुल गांधी यांनी अमित शाह यांच्याबाबत कथित आक्षेपार्ह विधान केल्याचा आरोप होता. या प्रकरणी भाजप नेते आणि जिल्हा सहकारी बँकेचे माजी अध्यक्ष विजय मिश्रा यांनी ४ ऑगस्ट २०१८ रोजी राहुल गांधी यांच्याविरोधात मानहानीची तक्रार दाखल केली होती.
२७ नोव्हेंबर २०२३ रोजी न्यायालयाने राहुल गांधी यांना खटल्याला सामोरे जाण्यासाठी समन्स बजावले होते. २० फेब्रुवारी २०२४ रोजी न्यायालयात हजर झाल्यानंतर त्यांना जामीन मंजूर करण्यात आला. त्यानंतर या प्रकरणात तक्रारदार आणि त्यांच्या साक्षीदारांचे जबाब नोंदवण्यात आले. राहुल गांधी यांचाही न्यायालयात जबाब नोंदवण्यात आला होता.
दरम्यान, राहुल गांधी यांच्या आवाजाच्या नमुन्याची तुलना करण्याची मागणी तक्रारदार विजय मिश्रा यांनी केली होती. मात्र, ही मागणी कनिष्ठ न्यायालयासह पुढील न्यायालयांतही फेटाळण्यात आली. २०२६ मध्ये या प्रकरणातील सुनावणी पूर्ण झाल्यानंतर २६ ऑक्टोबर रोजी विशेष एमपी-एमएलए न्यायालयाने राहुल गांधी यांना दोषमुक्त करण्याचा निर्णय दिला.
या निकालामुळे सहा वर्षांपासून सुरू असलेल्या मानहानीच्या खटल्याला महत्त्वपूर्ण वळण मिळाले असून, राहुल गांधी यांना मोठा न्यायालयीन दिलासा मिळाला आहे.
