नागपूर : शहरातील लकडगंज परिसरात जमिनीशी संबंधित मोठ्या आर्थिक फसवणुकीचा प्रकार उघड झाला आहे. दिवंगत ‘मटका किंग’ समद यांच्या मालमत्तेवर दावा करत एका महिलेने स्वतःला त्यांची पत्नी म्हणून सादर केले आणि बनावट कागदपत्रांच्या जोरावर बिल्डरकडून कोट्यवधी रुपयांची रक्कम उकळल्याचा आरोप समोर आला आहे.
माहितीनुसार, खैरुन्निसा नावाच्या महिलेने बेसा येथील जमिनीवर हक्क सांगत समद यांच्याशी वैवाहिक नातं असल्याचा दावा केला. त्यानंतर तिने कागदपत्रांमध्ये फेरफार करून संबंधित जमिनीचा व्यवहार बिल्डर रोहन ठक्कर यांच्याशी केला. या व्यवहारातून तिने एक कोटी रुपयांपेक्षा अधिक रक्कम वेगवेगळ्या टप्प्यांत घेतल्याचे समजते.
Gold Rate
Apr 24 2026 - Time 10.30Hrs
दरम्यान, जमिनीची नोंदणी होत नसल्याने संशय बळावला आणि अखेर बिल्डरने पोलिसांकडे तक्रार दाखल केली. त्यानंतर लकडगंज पोलिसांनी तत्काळ कारवाई करत महिलेविरोधात फसवणुकीचा गुन्हा नोंदवला आहे.
या प्रकरणात आणखी काही जणांचा सहभाग असण्याची शक्यता व्यक्त होत असून, पोलीस सर्व बाजूंनी तपास करत आहेत. समद यांच्या नावावर शहरात अनेक मौल्यवान मालमत्ता असल्याने या प्रकरणाचे स्वरूप अधिक गंभीर मानले जात आहे.
सध्या तपास सुरू असून, येत्या काळात या घोटाळ्याशी संबंधित आणखी धक्कादायक माहिती समोर येण्याची शक्यता आहे.
