नागपूर -नागपूरच्या भांडेवाडी परिसरातील गणेश बोरकर हत्या प्रकरणात पोलिसांना महत्त्वाचे यश मिळाले आहे. या प्रकरणातील कथित मुख्य सूत्रधार अमन ऊर्फ नाटो कैतवार याला पोलिसांनी उत्तर प्रदेशातून अटक केली आहे. तो गेल्या तीन महिन्यांपासून फरार होता. या प्रकरणात मृताची पत्नी मनीषा बोरकर हिच्यासह चार जणांना यापूर्वीच अटक करण्यात आली आहे. न्यायालयाने अमन कैतवार याला १६ ऑक्टोबरपर्यंत पोलीस कोठडी सुनावली आहे.
२ जुलै रोजी रात्री नागपूरमधील भांडेवाडी पोलीस ठाण्याच्या हद्दीतील हनुमान नगर परिसरात ४५ वर्षीय गणेश ऊर्फ गुरुदेव बोरकर यांच्यावर तीन अज्ञात मुखवटाधारी हल्लेखोरांनी धारदार शस्त्रांनी हल्ला केला होता. या हल्ल्यात गणेश बोरकर यांचा मृत्यू झाला. घटनेनंतर पोलिसांनी तपास सुरू करून मृताची पत्नी मनीषा बोरकर, अभिषेक ऊर्फ ददू साखरे, रोहित बोरकर आणि एका अल्पवयीन आरोपीला ताब्यात घेतले होते.
तपासादरम्यान अमन ऊर्फ नाटो कैतवार हा कथित मुख्य सूत्रधार असल्याचे समोर आले. घटनेनंतर तो फरार झाला होता. तो उत्तर प्रदेशात लपून बसल्याची गोपनीय माहिती पोलिसांना मिळाली. त्यानुसार भांडेवाडी पोलिसांनी कारवाई करून त्याला उत्तर प्रदेशातून अटक केली. न्यायालयाने त्याला १६ ऑक्टोबरपर्यंत पोलीस कोठडीत ठेवण्याचे आदेश दिले आहेत.
पोलिसांच्या तपासानुसार, गणेश बोरकर आणि त्यांची पत्नी मनीषा यांच्यात कौटुंबिक वाद सुरू होता. दोघेही वेगवेगळे राहत होते. गणेश यांच्याकडून जीवे मारण्याची धमकी मिळाल्याच्या कारणावरून मनीषाने कथितरीत्या साथीदारांच्या मदतीने हत्येचा कट रचल्याचा आणि सुपारी देऊन हत्या घडवून आणल्याचा आरोप आहे. या प्रकरणाचा पुढील तपास सुरू असून, अमन कैतवार याच्या चौकशीतून कथित कटासंदर्भात अधिक माहिती समोर येण्याची शक्यता आहे.
