नागपूर : बेलतरोडी परिसरात मोठ्या आर्थिक गैरव्यवहाराचा प्रकार समोर आला असून, पॉवर ऑफ अटर्नीचा गैरफायदा घेत तिघा भावंडांनी प्लॉटची बेकायदेशीर विक्री केल्याचा आरोप आहे. या प्रकरणात 3 कोटी 81 लाख रुपयांची फसवणूक झाल्याने पोलिसांनी गुन्हा दाखल केला आहे.
रामनाकर, मधुकर आणि श्रीनिवास कोरपाटी (रा. भेंडाळा, ता. मौदा) अशी आरोपींची नावे असून ते तिघे सख्खे भाऊ आहेत.
मिळालेल्या माहितीनुसार, मौजा वरोडा येथील संबंधित जमीन जयस्वाल यांच्या नावावर आहे. महसुली नोंदी (7/12 उतारा) दुरुस्त करण्यासाठी त्यांनी कोरपाटी भावंडांना पॉवर ऑफ अटर्नी दिली होती. मात्र, या अधिकाराचा गैरवापर करून आरोपींनी मूळ मालकाच्या परवानगीशिवाय तोच प्लॉट चार वेगवेगळ्या खरेदीदारांना विकल्याचा गंभीर आरोप आहे.
Gold Rate
Mar 30,2026 - Time 10.25Hrs
या व्यवहारातून कोट्यवधींची रक्कम उभी करण्यात आली असून, एकूण 3.81 कोटी रुपयांचा आर्थिक व्यवहार झाल्याचे समोर आले आहे. ही बाब लक्षात येताच जयस्वाल यांनी आरोपींकडे जाब विचारला आणि त्यानंतर प्रकरण पोलिसांपर्यंत पोहोचले.
बेलतरोडी पोलिसांनी तिघांविरुद्ध फसवणुकीचा गुन्हा दाखल केला असून, या प्रकरणाचा अधिक तपास सुरू आहे. आणखी धागेदोरे मिळण्याची शक्यता पोलिसांनी व्यक्त केली आहे.
