नागपूर : विधान परिषद स्थानिक स्वराज्य संस्था मतदारसंघ निवडणुकीच्या पार्श्वभूमीवर महसूल मंत्री चंद्रशेखर बावनकुळे यांनी महत्त्वपूर्ण विधान केले आहे. राज्यातील शक्य तितक्या विधान परिषद निवडणुका बिनविरोध व्हाव्यात, यासाठी सर्व पक्षांच्या नेत्यांशी चर्चा करण्यात येणार असल्याचे त्यांनी सांगितले.
बावनकुळे म्हणाले की, नागपूर विधान परिषद स्थानिक स्वराज्य संस्था निवडणूक कोणत्याही वादाविना आणि बिनविरोध पार पडावी, हा महायुतीचा प्रयत्न असेल. राज्यातील राजकीय पक्षांनी यासाठी सकारात्मक भूमिका घ्यावी, असे आवाहनही त्यांनी केले.
महायुतीने या निवडणुकीत 75 टक्के मतदानाचे लक्ष्य ठेवले असल्याचे सांगताना बावनकुळे यांनी सध्याच्या राष्ट्रीय परिस्थितीचा उल्लेख केला. “देशासमोर सध्या अनेक गंभीर आव्हाने आहेत. अशा वेळी निवडणुका बिनविरोध होणे ही लोकशाहीसाठी सकारात्मक बाब ठरेल,” असे ते म्हणाले.
सीट वाटपाबाबत बोलताना त्यांनी सांगितले की, समन्वय समिती विविध पक्षांशी चर्चा करून अंतिम निर्णय घेईल. पक्षांमध्ये विचारविनिमय झाल्यानंतर जागावाटपाचा फॉर्म्युला निश्चित करण्यात येईल.
“राज्यात शक्य तिथे बिनविरोध निवडणुका घडवून आणण्यासाठी आम्ही पुढाकार घेणार आहोत आणि सर्व पक्षांनी त्याला सहकार्य करावे,” असेही बावनकुळे यांनी स्पष्ट केले.
