अमरावती : जिल्ह्यातील परतवाडा येथे उघडकीस आलेल्या व्हिडिओ कांडाने संपूर्ण राज्यात खळबळ उडवली असून, तपास जसजसा पुढे सरकत आहे तसतसे या प्रकरणाचे गांभीर्य अधिक वाढत आहे. सुरुवातीला काही व्हायरल क्लिप्सपुरते मर्यादित वाटणारे हे प्रकरण आता मोठ्या जाळ्याशी संबंधित असल्याचा संशय व्यक्त केला जात आहे.
या प्रकरणात पोलिसांनी दुसरी मोठी कारवाई करत उजेर खान इकबाल खान याला अटक केली आहे. तपासात समोर आले की, त्याने मुख्य आरोपी अयान अहमद यांच्या मोबाईलमधील आक्षेपार्ह व्हिडिओ डाउनलोड करून ते सोशल मीडियावर व्हायरल केले. सध्या उजेर खानला पोलिस कोठडीत ठेवून सखोल चौकशी सुरू असून, त्यातून अनेक महत्त्वाचे धागेदोरे समोर येण्याची शक्यता आहे.
दरम्यान, मुख्य आरोपी अयान अहमद याला यापूर्वीच अटक करण्यात आली असून, त्याच्यावर भारतीय न्याय संहितेच्या विविध कलमांखाली गुन्हा दाखल करण्यात आला आहे. न्यायालयाने त्याला २१ एप्रिल २०२६ पर्यंत पोलिस कोठडी सुनावली आहे.
Gold Rate
Apr 15 2026 - Time 10.30Hrs
पोलिसांनी आरोपीच्या मोबाईलमधून सुमारे ३५० हून अधिक आक्षेपार्ह व्हिडिओ जप्त केले असून, त्यामध्ये सुमारे १८० मुलींचा समावेश असल्याचा धक्कादायक अंदाज आहे. या व्हिडिओमधील मुलींची ओळख पटवण्याचे काम युद्धपातळीवर सुरू आहे. आतापर्यंत ८ पीडितांची ओळख पटली असून, उर्वरितांची ओळख गोपनीयतेने केली जात आहे.
तपास यंत्रणांनी या प्रकरणाची संवेदनशीलता लक्षात घेऊन महिला पोलिस अधिकाऱ्यांची विशेष टीम नेमली आहे, जेणेकरून पीडितांना कोणत्याही दबावाशिवाय आपली बाजू मांडता येईल.
तसेच, आरोपीने काही डेटा डिलीट केल्याची माहिती समोर आली असून, सायबर विभाग त्या डेटाची पुनर्प्राप्ती (रिकव्हरी) करण्याचा प्रयत्न करत आहे. या डेटामधून आणखी मोठे धागेदोरे मिळण्याची शक्यता वर्तवली जात आहे.
दरम्यान, या प्रकरणाने राजकीय रंगही घेतला असून, स्वतंत्र विशेष तपास पथक (SIT) नेमण्याची मागणी जोर धरत आहे. हे प्रकरण केवळ वैयक्तिक स्वरूपाचे आहे की यामागे एखादे संघटित रॅकेट कार्यरत आहे, याचा उलगडा पुढील तपासात होणार आहे.
सध्या संपूर्ण राज्याचे लक्ष या प्रकरणाच्या तपासाकडे लागले असून, आगामी काळात आणखी धक्कादायक खुलासे होण्याची शक्यता नाकारता येत नाही.
अचलपूर विधानसभा मतदारसंघाचे आमदार प्रवीण तायडे यांनी या प्रकरणाची सखोल चौकशी करण्याची जोरदार मागणी करत मोठ्या रॅकेटचा संशय व्यक्त केला आहे.
या प्रकरणात 10 ते 12 जणांचा समावेश –
आमदार प्रवीण तायडे म्हणाले की, या प्रकरणातील पीडित मुली आणि महिलांनी निर्भयपणे पुढे यावे. त्यांची ओळख पूर्णपणे गोपनीय ठेवली जाईल, असा विश्वास त्यांनी दिला. तसेच, सर्व पीडितांनी पोलिसांत तक्रार नोंदवावी, असे आवाहन करत त्यांनी पोलिसांनी या प्रकरणाचा सर्वंकष तपास करावा, अशी मागणी केली. या प्रकरणात आणखी १० ते १२ जणांचा सहभाग असू शकतो, असा संशय व्यक्त करत संबंधितांना ताब्यात घेण्याची गरज त्यांनी अधोरेखित केली. “हे केवळ एक प्रकरण नसून मोठ्या रॅकेटचा भाग असू शकतो,” असेही त्यांनी स्पष्ट केले.
पोलिसांकडून पीडितांचा शोध सुरू-
जिल्हा ग्रामीण पोलीस अधीक्षक विशाल आनंद यांनीही या प्रकरणाबाबत महत्त्वपूर्ण माहिती दिली. त्यांनी सांगितले की, पीडित तरुणींच्या कुटुंबीयांनी पुढे येऊन पोलिसांशी संपर्क साधावा. पोलिसांकडूनही पीडितांचा शोध सुरू असून, साध्या वेशातील महिला पोलिस कर्मचाऱ्यांना त्यांच्या कुटुंबांपर्यंत पोहोचवण्यात येत आहे.
विशेष म्हणजे, दोन दिवस कोणतीही तक्रार पुढे न आल्यामुळे पोलिसांनी स्वतःहून गुन्हा दाखल केला असल्याची माहिती त्यांनी दिली. “या प्रकरणातील महिलांनी पुढे येऊन घडलेली घटना आम्हाला सांगावी. आम्ही कायदेशीर कारवाई करत आहोत,” असे आश्वासनही त्यांनी दिले.
या प्रकरणाच्या पार्श्वभूमीवर संपूर्ण जिल्ह्यात खळबळ उडाली असून, तपास यंत्रणा अधिक सतर्क झाली आहे. येत्या काळात या प्रकरणातून आणखी मोठे खुलासे होण्याची शक्यता व्यक्त केली जात आहे.
