नागपूर :प्रेमाच्या त्रिकोणातून महिलेच्या प्रियकराने तिच्या जुन्या प्रियकराचा गळा दाबून हत्या केल्याची धक्कादायक घटना समोर आली आहे.
ही घटना नागपूर ग्रामीणच्या बुटीबोरी पोलीस ठाण्यांतर्गत मोहगावजवळ घडली. या पोलिसांनी या घटनेतील महिला आणि तिच्या प्रियकराला अटक करण्यात आली आहे. संतोष असे मृत तरुणाचे नाव आहे. तकिया धंतोली येथे राहणारा संतोष चुन्ने हा ई-रिक्षा चालवायचा. तकिया धंतोली येथे राहणाऱ्या नलू गंगाधर पेंदाम या महिलेसोबत त्याचे प्रेमसंबंध होते. या महिलेचा आणखी एक प्रियकर होता ज्याचे नाव राहुल गायकवाड असून तो गांधीनगरमध्ये राहतो.
संतोष रविवारी त्याची ई-रिक्षा घेऊन बुटीबोरीच्या दिशेने निघाला होता. त्यावेळी त्याच्यासोबत त्याची गर्लफ्रेंड नलूही होती असे सांगण्यात येत आहे. मात्र, नियोजनानुसार राहुल गायकवाड हाही तिच्या मागे मोपेडवरून येत होता. संधी साधून दोघांनी संतोषला मोहगावजवळील सेलीला ले-आऊटमधील मोकळ्या जागेवर नेऊन त्याचा गळा दाबला.
या खुनानंतर दोन्ही आरोपी पुन्हा तेथून पळून नागपुरात आले. संतोष हा महिलेचा जुना प्रियकर होता, त्याने महिलेला इतर कोणाशीही संबंध ठेवण्यास आणि बोलण्यास मनाई केल्याचे सांगितले जात आहे.
दरम्यान, आरोपी राहुलसोबत तिचे प्रेमसंबंध निर्माण झाले होते. त्यामुळे संतोषची त्यांनी हत्या केली. रविवारी दुपारी एका मेंढपाळाने संतोषचा मृतदेह तेथे पडलेला पाहिल्यानंतर पोलिसांना माहिती दिली. पोलिसांनी मृताची ओळख पटवून आरोपीचा शोध सुरू केला. तपासादरम्यान पोलिसांना सीसीटीव्ही फुटेज मिळाले आणि या सुगावानंतर पोलिसांनी दोन्ही आरोपींना अटक केली. नागपूर ग्रामीण स्थानिक गुन्हे शाखेच्या पोलिसांनी ही कारवाई केली.
